Diabierna awor, dia 16 di december, Fundacion Kapel di Bethania lo habri e portanan di Klooster Imeldahof den un ambiente di fin di aña y asina presenta na publico un tremendo concierto di Pasco.
Pa e anochi aki lo tin participacion di diferente coro di Noord manera ‘Coro Santa Anna’ bou direccion di Igmar Maduro, ‘Coro di Hospital‘ y ‘Coro di Pasco’ bou direccion di Tica Giel y Coro di hobennan bou direccion di Linda Figaroa. Tambe lo tin presentacion di algun solista y e acompañamento instrumental ta den mannan di musiconan di Noord. Nan tur lo deleita e publico cu bunita cancionnan di Pasco.
Banda di e concierto aki lo tin tambe un bazar, unda cu lo percura pa tin diferente cuminda, cos dushi y articulonan di Pasco na benta. Grupo infantil di Noord ‘Angelnan di Rosario’ lo interpreta un bunita pesebre bibo.
E festividad aki lo ta for di 6 or di atardi te cu 10 di anochi y e entrada ta completamente gratis.
Un danki special ta bay na nos comerciantenan entre otro Setar N.V., Flora Market Place y Romar Trading. Cu nan contribucion por haci e evento aki posibel door di entre otro drecha y dorna e edificio den e esfera di Pasco.
Ta invita Aruba completo pa bin pasa un anochi placentero y experencia e edificio den su esfera di Pasco di Nacemento.