Proceso pa elaboracion di Censo cu ta bay wordo aplica pa e temporada 2020 y ta invita esunnan cu ta den seccion di educacion na Aruba pa nan por duna un input riba e cuestionario di e Censo 2020. Sra. Desiree Helder, Health Statistician di Centraal Bureau voor de Statistiek (CBS), ta amplia.
Cualkier ayudo pa traha e cuestionario di censo 2020 cu preguntanan cu nan por a haya esencial pa un formula maneho anto den futuro keda traha riba un planning debido pa cu educacion na Aruba. Nan a wordo invita revisa e ultimo cuestionario di Censo 2010 y aporta pa loke mester prepara pa Censo 2020.
Sra. Helder a sigui bisa cu semper ta traha ariba e preguntanan di antemano, unda tambe ta mantene e preguntanan di ultimo censo cu a wordo haci. Pero en todo caso mester e feed back di e organonan cu ta duna e cifranan di users for di diferente departamento di gobierno y e diferente schoolbestuurnan. pasobra nan ta uza e data cu ta wordo colecta. Pa e motibo ey CBS lo kier tende di nan banda cua ta nan necesidad y ki sorto di dato nan di dje, pa asina provee di e datonan cu nan mester di dje. Y ora nan ta sigur cu e cuestionario di censo lo bay tin tur e informacion rekeri di e comunidad di Aruba.
Segun e richtlijnan di Nacionnan Uni, y esaki ta indica cu cada 10 aña ta ideal pa haci un Censo. Aunke cada pais por tuma decision pa hacie den mas corto plazo pero unda tambe mester considera cu e gasto ta hopi grandi. Sra. Helder di CBS ta expresa cu en berdad mirando e desaroyo asina lihe di nos Isla , por trece e posibilidad pa haci e censo cada 5 aña den futuro e ora. Semper e fondonan mester wordo revisa door cu e gastonan ta enorme pero e resultado sigur tambe ta grandi den sentido aki, y base di esaki lo keda midi cada cuanto tempo ta corecto pa censo tuma luga. Tambe tin e caso unda cu tin mas hende na Aruba y e grupo cu ta bay haci e censo mester a crece, y tin un crecemento considerabel den e poblacion den relacion cu ultimo censo na 2010 unda awor aki ta papiando di 116 mil persona registra.
E parti operativo ta bayendo hopi bon unda censo ta bay bin den un sistema digital cu ta bay yuda facilita e proceso den cantidad, den un forma hopi mas lihe y eficiente cu un calculacion di 1500 encuestado riba caya pa un periodo di 10 dia y ta calcula cu esey ta cera den un bon maneho pa logra encuesta tur hende. Censo ta tuma luga cu encuesta cas pa cas na tur hogar unda ta stipula un 45 mil vivienda y ta encuesta 1500 pa dia, den un transcurso di 10 dia y ta wordo yuda cu un team di inspecteur. Cada inspector lo tin 30 hogar pa bishita. E lo ta un movecion hopi amplio pa garantisa cu e trabou lo keda cla den e tempo stipula pero tambe cu e datonan colecta e berdad ta esun corecto cu por wordo uza pa e diferente instancianan.
Den caso cu hende ta keda sin encuesta ya sea cu a bay biaha of cu no por a wordo haya, e posibilidad aki tambe a wordo evalua caminda cu CBS ta bay percura pa tene un otro sistema e ora cu un periodo di 2 siman extra cu e persona ainda por wordo entrevista a traves di un app of un espacio riba nan website unda e hende por a geef door cu nan a keda afo si nan tabata den exterior por ehempel, anto e ora nan por tene esaki na cuenta of tambe nan por pasa libremente na nan oficina como un otro opcion.
Tur esunnan na Hospital, KIA of cu otro tipo di vivienda cu no ta esunnan normal, manera condominio of hotel tambe a wordo inclui y contempla riba e censo y nan lo haya e bishita di un agente special di CBS mes.
Por ultimo, Sra. Desiree Helder ta informa cu tur esunnan interesa pa forma parti di e 1500 encuestado por pasa yena e aplicacion pa haci registro, aunke ainda no a wordo habri. Pero na CBS tin formulario disponibel pa por aplica. Pero ta importante pa pueblo sa cu ta cuminsando cu e preparacionnan pa Censo 2020 y CBS lo keda duna mas informacion riba e topico aki, pa motiva e pueblo pa coopera cu CBS.