Coordiator di Ministerio di Infrastructura Sra. Indra Zaandam ta expresa di ta sumamente contento di a ricibi invitacion di ATIA pa duna mas informacion tocante e ley cu lo wordo implementa e prome kwartal di 2019 cu ta prohibi uso y benta di plastic di single use.
Sr. Zaandam ta menciona cu Aruba ta poco laat ya cu Aruba tin problema cu desperdicio. Tin problema di sushi riba nos isla y e forma di procesa e sushi no ta e forma mas adecuado actualmente tampoco e miho pa nos salubridad pero cu e sector comercial por contribui na un solucion.
Lo splica e comunidad comercial kico e ley ta ensera y lo ricibi feedback den un aña di e comerciante. E ley no lo sali solamente for di gobierno pero lo ta un ley cu tur hende por para tras di dje pa e ley wordo firma exitosamente. E tarea di Ministerio ta di bin cu reunión, comunica y planifica cu e cuerpo di Aduana cu lo ta responsabel y e autoridad riba e tema aki. Ta bin cu prohibicion pero tambe lo duna informacion tocante cua producto alternativo cu por tin. Esaki nan ta tipo di strategia nan cu mester wordo implementa. E prohibicion lo cuminsa na 2019 pa asina tur hende tin un anja pa adapta nan negoshi y inventario y cu pa den 2020 cuminsa cu e trayecto.