Premier Evelyn Wever-Croes a informa un rato pasa cu el a yega na acuerdo cu Hulanda pa stop e cortamento di salario. Esaki despues di negosacionnan cu Hulanda, awe mainta Secretario di Estado Alexandra van Huffelen a bay di acuerdo pa Gobierno di Aruba stop e recorte, bou di 3 condicion:
- E ley di Wever-croes-norm of asina yama LNT mester ta na vigor. E ley aki ta den e fase final di tratamento den Parlamento y lo wordo trata pronto.
- E gastonan adicional mester sali di e propio presupuesto pasobra Hulanda lo no duna sosten di likides pa e gastonan aki. Manera ta conoci Gobierno di Aruba a incorpora e gastonan aki den e begroting di 2022 pa paga e 5% bek den di dos mita di aña.
- E recorte di 25% di salario di politiconan lo keda. Premier Evelyn Wever-Croes anteriormente a bisa caba cu si politiconan mester sigui corta cu 25%, nan lo haci’e, basta cu empleadonan di sector publico y semi-publico si haya nan salario bek.
Premier Evelyn Wever-Croes ta hopi contento cu e decision aki. “Nos meta tabata caba pa entrante 1 di juli 2022 stop e recorte mensual di 5%, y pa otro aña 2023, stop e recorte di 12.6% completamente. Y awor esaki a wordo realisa”. Esey kiermen cu entrante 1 di juli 2022, e empleado publico por bay haya su salario completo bek, y entrante otro aña e por haya su vakantie uitkering tambe. Y sin cu mester troca esaki pa dianan liber. Pa loke ta e condicionnan cu Hulanda a impone, Premier lo bay delibera cu Parlamento riba e ley di “Wever-Croes-norm”, pa haya sa ki tempo e ley lo wordo trata y lo pidi Parlamento pa trata esaki mas lihe cu ta posibel pa asina tur cos ta cumpli cu n’e pa cuminsa paga e empleado publico y semi publico e 5% entrante 1 di juli 2022. “Mi ta gradici tur empleado publico y semi publico pa tur nan sacrificio duna desde mei 2020, y mi ta felicita boso. E negosacion tabata duro y a tarda, pero mi ta hopi contento cu pronto empleadonan lo cobra nan salario completo bek. Mi ta contento cu nos a cumpli cu boso”, Premier Wever-Croes a expresa.
