Desde mey mey di aña a activa algo mas di 20 atleta entre 14 pa 18 aña. Mas cu claro tin atleta miho desaroya cu otro pero idea tabata pa brinda e oportunidad pa tur haya mesun calidad di entrenamento pa asina den periodo di un aña por nota y midi e progreso den dicho atletanan. ASB desde regreso di Colombia mey mey di October a continua cu entrenamento. Coaching Staff di e categoria aki a scoge pa bay traha mas duro y dedica riba condicion fisico di nos atletanan hoben. Estudionan y tecnologia ta mustra pa Bo por competi tur dia tras di otro riba un nivel aceptabel Bo condicion fisico mester ta optimal. E atletanan a gusta masha hopi y a haci compromiso cu nan Coaching Staff cu ta nan deseo pa continua cu entrenamento. Basa riba esaki e grupo aki lo keda entrena te cu 14 di December. Despues lo tuma un break cortico relaciona cu dianan festivo y diaranson 11 di Januari lo continua cu un frecuencia di 2 bes pa siman. Manera e fecha exacto di proximo competencia bira conoci lo switch esaki na 4 bes pa siman minimo. E atletanan hoben ta mustrando un interes enorme y ta acudiendo na tur entrenamento cu un all around porcentahe di riba 90%. ASB lo keda traha duro pa hiba e edad aki na un nivel competitivo den corto tempo. Softball den pleno desaroyo.