Aeropuerto tambe lo bay tuma e pasonan necesario, segun Hendrick Croes, vocero di aeropuerto. Esaki ta pa siguridad di no solamente di e biaheronan, pero di e empleadonan y tambe e edificio mes.
Aeropuerto di Aruba ta ricibiendo masha hopi pregunta si aeropuerto ta bay cera of ta keda habri. Intencion no ta pa cera, sino keda operacional mas tanto cu ta posibel. Tanten cu e parti di siguridad, tanto pa e empleado y e pasaheronan ta permiti, aeropuerto di Aruba ta keda habri. Si surgi otro problemanan, si pista bay completamente bao di awa. Esaki ta pensando riba un caso mas extremo. Un biaha mas, mester ta prepara pa cualkier eventualidad pero esaki ta un di e extremonan cu lo trece cune cu e aeropuerto lo tuma e decision pa cera.
Loke ta consehabel pa tur esnan cu ta biahando, principalmente diahuebs, diabierna y diasabra, ta pa tuma contacto cu e aerolinea cu nan ta biahando cun’e, pa asina verifica si e vuelonan aki ta bay door si of no. Si tin cambio, tin retraso, tin desviacion, Tur esaki ta posibel scenarionan cu lo por sosode.
Un biaha mas, no ta un decision di aeropuerto si vuelonan ta subi of no, pero e ta keda den man di e aerolinea. E aerolinea lo tin tur e responsabilidad pa loke ta sosodiendo cun’e.
Aeropuerto di Aruba tambe, for di dialuna ta siguiendo e pasonan di e disturbio cu tin den e region. Esaki ta nifica cu for di dialuna caba ta reuniendo cu tur partner, tur aerolinea, consecionario, tambe preparando e edificio pa cualkier eventualidad.
Ta conoci tambe cu riba un pista di aeropuerto, tin cierto obhetonan cu por ta los of no los, no mara den tera. Tur esakinan ya caba a wordo hala, poni den un area unda cu ta hopi mas safe. A tuma precaucion hunto cu tur aerolinea, consecionario pa nan tambe percura pa nan aerea di trabao, tambe ta sigura, asina cu conhuntamente como comunidad di aeropuerto traha hunto, pa asina cu por garantisa cu e operacionnan por bay den un forma mas safe posibel. Manera cu a wordo bisa, ta wordo spera pa diahuebs anochi y pa diabierna mainta lo tin e impacto di mas grandi. Akinan tambe ta caminda cu e aeropuerto di Aruba ta pidi cooperacion di su empleadonan pa drenta tiki mas tempran, pa si en caso duna un ayudo extra na e situacion aki. Lo ta conta cu e empleadonan tambe, segun Croes.
E mensahe principal ta pa publico en general, cu si ta bay biaha diahuebs, diabierna of diasabra, tuma contacto cu e aerolinea pa verifica si e ta na ora of si e ta bay door of no. E por trece como consecuencia pa no yena aeropuerto cu pasahero cu eigenlijk no tin vuelo. Si bo no tin e vuelo, ta conseha pa no bin aeropuerto tampoco, sino tene contacto cu bo aerolinea y nan lo informa si e vuelo ta bay door si of no y si tin cambio den schedule.
Aeropuerto ta premira un temporada te cu mas of menos diadomingo pa dialuna, unda cu tin basta informacion cu na cada momento tin cu bay keda sigui di cerca pa por tuma cierto decisionnan. No por tuma cierto decisionnan di awor caba, mirando cu ta trata algo di naturalesa y akinan ta loke no tin control riba esey, segun Hendrick Croes.