Power TV ta ruman di Power FM y lo dedica nan mes na ilumina e pantaya di television na Aruba, Boneiro y Corsou cu e miho programacion atrabes di tecnologia cu ta surpasando tur medio y frontera aki na Aruba. E meta ta keda pa mantene un reputacion sin igual, treciendo creatividad, talento y idea nan nobo tiba pantaya. E programacion na momentonan aki ta consisti di comercial limita, pelicula pa tur tipo di genero, combina cu noticia merdia y noticia anochi cu ta pasa tur dia di siman. Pa completa e programacion lo conta cu nos mesun hendenan local cu lo bin cu nan mesun propio produccionan local.
Propietario di Power TV, Sr. Ralph Maduro tin un vision hopi claro pa loke ta trata Power TV y lo conta cu e Director di Power TV, Sr. Jason Margarita pa haci esaki un realidad. Cu sosten di diferente partner manera Sr. Tito Lacle di Noticiacla y Sr. Baboe Hoek di Masnoticia, Power News ta priminti di ta un lider den noticia aki na Aruba. Sin lubida cu un programacion original manera EntertainmentNEWS cu lo pone un spotlight riba nos artistanan local, un weekly talk show hopi apart, diverso y divertido cu e tremendo host Julio Andrews, un show inspirativo y yen di motivacion cu ta Spotlight cu Glen Penniston, un cobertura completo den e mundo di deporte aki na Aruba danki na Greg Croes y su PowerSPORT, Power TV lo sa di tin un programacion completo. Noticia lo keda den man di Julissa Margarita “Julie-Julie” cu a demostra di ta un bon presentadora cu un vision neutral y claro di noticia pa Power News y cu den menos cu un siman ya caba a conta cu un sintonia online di miles.
Mirando e gran acogida y reaccionan masal biniendo for di e pueblo di Aruba, a realisa un biahe cortico pa Boneiro, unda e propietario y director di Power TV a logra cera partner nobo den forma di Energia Vision Canal 55. E asociacion aki lo trece Power TV riba Cable aki na Aruba riba Canal 55 pa e audiencia aki na Aruba, Boneiro y Corsou por disfruta di nos programacion local y mas.
Power TV kier crea un relacion estrecho cu e pueblo di Aruba cu un focus riba nos cultura, idioma, herencia y dimes nos hendenan y hunto nos lo por crece y prove tur hende aki na Aruba cu un otro opcion riba Cable. Sin lubida cu nan lo sigui stream 24/7 riba nan website www.powertvaruba.tv y tambe riba Facebook.