Dos donacion na instancianan deportivo y revelo di proyecto di edificio nobo pa Power fm den 2019.
Power FM dunando apoyo na deporte di Aruba, diamars anochi a haci dos donacion pero alabes haci anuncio di construccion di nan edificio den 2019. E instancianan deportivo ta Fundacion Kayak Aruba y 297 Soccer Academy. Sr. Ralph Maduro como Sr. Ruben Garcia a ricibi representante di e dos instancianan pa haci e donacion na nan. Prome a toca Sr. Ruben Garcia pa haci donacion na Fundacion Kayak Aruba cu ricibi su check di 7 mil 563 florin.
Fundacion Kayak Aruba ta dedica na hobennan cu ta gusta e deporte di kayak y ta contribui den e muchanan desaroyo y diciplina riba lama. For di tempo cu a cuminsa cu e fundacion e prome kayak nan tabata segunda mano y awor ta tempo pa reemplaso segun representante di e fundacion. Di parti Fundacion Kaya Aruba nan ta hopi contento y gradici cu e donacion y sigur lo bay haci bon uzo di dje na bienestar di e hobennan pasobra e interes ta grandi den e deporte aki. Mesora Sr. Ralph Maduro a sigui cu e di dos donacion cu a bay pa 297 Soccer Academy. Un suma di 2 mil florin a keda presenta na nan cu por yuda pa cumpli cu e proyectonan di Soccer camp cu ta organisa. Segun e representante pa organisa un evento sin donacion y sponser ta dificil haci esaki. E eventonan cu ta organisa ta yuda e muchanan den nan desaroyo di futbol pero tambe have fun na un manera sano den nan vakantie. Na december awor 297 Soccer Academy ta bay cumpli 1 aña di existencia y nan tin como 60 mucha registra na e academia. Pa cumpli cu e cantidad di mucha tin dos localidad di cual uno ta na Playa y otro na Savaneta. E edad di e muchanan ta di 4 pa 15 aña unda ta yuda nan cu e tecnico basico pa nan desaroyo. Tur club cu kier haya ayudo pa nan hungado por haya training extra por acudi serca nan. E idea ta pa cuminsa cu e muchanan for di chikito pa asina poco poco futbol di Aruba crece y crea futbolistanan grandi. Di e forma aki Power fm a haci donacion pa engrandece e mundo deportivo di Aruba. E anochi special aki no a keda te aki pasobra tabatin un sorpresa. Pa 2019 Power Fm tin metanan grandi y pa medio di dos potret grandi a revela construccion di un edificio nobo y con e edificio nobo di Power FM lo bay bira. Un proyecto cu tabata un soño segun Ralph Maduro y awor ta birando realidad pasobra den 2019 e construccion ta bay cuminsa. E logro mas grandi pa Power Fm cu e construccion di e edificio lo ta den Paradera mes. Segun Sr. Ruben Garcia despues di seis aña un soño ta bira realidad y via e dos potretnan grandi cu a keda presente por mira fachada di e edificio. Power Fm tin un team manera famia y hunto a logra hopi den desaroyo y exito di e radio y pa 2019 ta bay cuminsa cu construccion di un edificio nobo.