VIENNA, Austria — Representantenan di China, Rusia y e principal potencianan Europeo, cu ta sigui comprometi cu e pacto nuclear cu Iran, diadomingo a reuni na Vienna cu’n delegacion Irani, pa busca e forma di salba e acuerdo nuclear.
Obhetivo di e reunion ta di analisa e problemanan asocia na e aplicacion di e acuerdo nuclear, una bes Iran a supera e limitenan di e almacenamiento y enrikicimento di uranio estableci den e texto.
Iran, poco tempo atras a supera e limite di enrikicimento di uranion di e pacto na 2015, alegando cu e practica lo por wordo reestableci si e otro firmantenan di e acuerdo, Alemania, Francia, Gran Britania, China, Rusia y Union Europeo ofrece suficiente incentivo economico pa compensa e sancionnan di Washington.
Presidente di Merca, Donald Trump, a reintroduci e sancionnan depsues di a saca su pais for di e acuerdo. Tambe el a aumenta su presencia militar den e region di Golfo Persico.
Expertonan ta adverti di un nivel mas halto di enrikicimento y un reserva creciente di uranio lo reduci den un aña e loke Iran lo mester pa tin suficiente material pa fabrica un bom atomico, algo cu Teheran ta nenga di ta buscando, pero cu el a acuerdo a stroba.
Siman pasa, autoridadnan Frances cu a reuni cu’n enviado Irani a subryaa e necesiad di cu Teheran respeta rapidamente e acuerdo nuclear den e region di Golfo Persico.