GEORGIA, Merca- Dieseis trahado di Oficina di Post a wordo condena pa a acepta soborno di 250 dollar pa distribui cocaina di contrabando, segun un nota di prensa di Oficina Federal di e distrito noord di Georgia. E proceso contra e empleadonan a cuminsa na 2015.
E sentencianan ta varia di entre 3 y 9 aña di prizon, ademas di contempla boetnan cu den algun caso ta supera 10 mil dollar. “E empleadonan di Post ta wordo paga pa entrega post, no droga”, según e agente policial di e Oficina di Inspector General di Servicio Postal di Merca, Imari R. Niles.
Pa a catch e trahadonan corupto, e agentenan federal a haci uzo di un agente undercover cu a laga pasa pa un narcotraficante. Ora di drenta den contacto cu nan, e acusadonan a acepta pa entrega e paketenan di droga y negocia loke nan lo cobra mediante soborno. Nan a opta pa e benta di cocaina enbes di marihuana cu nan a kere cu lo trece miho beneficio. Ademas, algun di nan a presenta na e agente undercover nan colega cu tambe tabata kier a participa, ora cu nan a wordo puntra si nan tabata conoce otro hende cu tabata haci esaki tambe.
Un agente di FBI di Atlanta, Georgia, Chris Hacker, a califica e sucedido como un “flagrante abuso di e confiansa publico” y a agrega cu esaki “no solamente ta mancha e reputacion di tur e empleadonan di e Servicio Postal di Merca”, sino cu tambe, ta pone e habitantenan di e zona unda nan tabata pasa e droga, den peliger.