Riba 15 Juni Post Aruba N.V. lo emiti un set di stampia nobo titula “Copa Mundial di FIFA – Rusia 2018”. E set ta consisti di dos (2) stampia, esta 130 cen y 220 cen, pa un total di AWG 350 cen. E envelop ‘First Day Cover’ ta costa AWG 500 cen.
E stampianan ta diseño di Sr. Rudberth Wolff y nan a wordo imprimi pa Johan Enschedé Security Print.
E aña aki lo ta e di 21 Copa Mundia di FIFA y lo tene e torneo di futbol na Rusia.
Cuminsando dia 14 di juni cu e prome partido entre Rusia y Saudi Arabia y e gran final lo ta dia 15 di juli. Tin 32 ekipo participando, cu Alemania defendiendo nan titulo despues di a derota Argentina 1-0 den tempo extra na 2014. Islandia y Panama ta e nobatonan, teniendo nan prome aparicion den e Copa Mundial di FIFA.
Zabivaka ta e mascota oficial di e Copa Mundial di FIFA 2018, representando un wolf cu bril deportivo color oranje bisti. E ta bistiendo e combinacion di color blanco, blauw y cora cu ta e colornan nacional di e ekipo di Rusia. A selecciona e mascota a base di votacion riba internet y e diseño tabata den man di un diseñado studiante, Ekaterina Bocharova.
Pa e edicion di FIFA aki di Post Aruba N.V., a traha un Producto Oficial y Licencia. E ta consisti di un envelop ‘First Day Cover’, un stampia di 130 cen y un di 220 cen cu e Stempel di Cancelacion. Cada un ta bin cu un of mas marca oficial di e Copa Mundial di FIFA. E ‘First Day Cover’ y e Stampianan ta marca cu e Logo Oficial Licencia, haciendo e producto aki di Post Aruba N.V. un Producto Oficial y Licencia di FIFA.
E biaha aki e ‘First Day Cover’ ta e diseño tematico di FIFA 2018 pa e Copa Mundial na Rusia uzando e oro y blauw. E fondo blauw ta yena cu icono cu ta representa Rusia. Ariba, na e banda robes, por encontra e emblema oficial di e Copa Mundial di FIFA – Rusia 2018.
E stampianan, 130 cen y 220 cen, ta representa futbolistanan den situacionnan intenso durante torneo.
E prome stampia, cu balor di 130 cen, tin un fondo abstracto berde separa cu formanan geometrico, representando e veld di futbol berde. E hungadonan ta bisti den diferente color demostrando asina con diverso e uniformnan por ta den color. E dos hungadonan ta den un postura dinamico luchando pa e bala, uno ta ataca y e otro ta defende. E stampia ta bin cu e Emblema Oficial di e Copa Mundial di FIFA 2018.
E di dos stampia, cu balor di 220 cen, tin un tema di color completamente diferente. Esaki ta den blanco, blauw y cora, cu ta e colornan oficial di e ekipo di Rusia. E tin un fondo abstracto blauw delinea cu formanan di hexagon. Esaki ta e net di gol cu ta den e fondo di e keeper. E stampia ta bin cu Zabivaka, e logo di e Mascota Oficial di FIFA den su postura di celebracion.
E stampianan aki lo ta disponibel na tur oficina di Post Aruba, pues na Oranjestad, San Nicolas y Sta. Cruz.
Percura cu bo tin e set aki den bo coleccion, como cu e cantidad ta limita.
Pa mas informacion riba e edicion aki di “Copa Mundial di FIFA – Rusia 2018”, por fabor, tuma contacto cu Departamento di Filatelia na (+297) 528-7678, cu nan oficina principal situa na J.E. Irausquinplein # 9, Oranjestad of bishita nan pagina di Facebook Aruba Stamps.