Dia 30 di November 2016 Post Aruba N.V. ta emiti un serie nobo di stampia titula ‘Antiguedad 2016’.
E serie ta consisti di 5 stampia balora na 90 cen, 130 cen, 205 cen, 250 cen y 325 cen, cu ta yega na un prijs total di Afl. 10,00 y e ta acompaña pa su ‘envelop di prome dia di emision’ cu ta costa Afl. 11,50.
E diseñonan pa e stampia aki ta un creacion di Alfonso de Windt y e stampianan ta imprimi na Johan Enschedé Security Print.
E serie di stampia ta obtenibel entrante 30 di November 2016 na e diferente oficinanan di Post Aruba, respectivamente na Oranjestad, San Nicolas, Sta. Cruz y Palm Beach Plaza Mall.
Pa mas informacion tocante e stampianan ‘Antiguedad 2016’ por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon 528-7678, of bishita su pagina di Facebook Aruba Stamps.
E bunita serie aki no por falta den bo coleccion. Busca esun di bo awe mes, ya cu e cantidad ta limita.
90 cen-Antiguo hero di strica di gas
Enterprise Tool & Metal works na Chicago a traha e hero di strica aki na 1900 y nan a keda riba mercado te den añanan 70 di e siglo pasa, prome cu e heronan di strica di coriente a bira un alternativa mas pagabel y sigur. Algun fabricante di her’i strica a comete e fout di pone un man di palo, cu facilmente ta bira cayente y posiblemente ta pega candela. Coleman a sigui mehora su heronan di strica y a mehora tambe e presion di gas di tal manera cu di biaha el a bira un exito. Coleman a traha nan den colornan distinto, fuera di esunnan standard den color “blauw friu”, den transcurso di 20 aña di duracion (1929-1948) di e hero di strica.
130 cen-Antiguo molina di koffie
Pa loke ta trata e sortonan di ‘molina di koffie’, tin un diferencia den e forma con cada un ta mula e koffie. Esunnan grandi para riba vloer of e modelo di molina di koffie riba toonbank, nan a uza den campo den e shapnan durante siglo 19. Nan a traha e molinanan chikito pa uza na cas na 1894. Ya no tabatin mucho interes mas na 1930.
E modelo cu un wiel uza den tienda, a keda patenta na 1870 y e modelo cu dos wiel na 1873. E interes nobo pa koffie fresco mula, a produci hopi molina electrico y molina di man.
Te ainda bo ta haya reproduccion di algun estilo bieu.
205 cen-Antiguo lampi di azeta di petroleo
Un lampi di azeta di petroleo ta un obheto cu nan ta uza pa produci luz continuamente durante un periodo pa medio di un fuente di combustible a base di azeta di petroleo. E uzo di lampi di petroleo a cuminsa ya miles di aña pasa te dia di awe, aunke generalmente masha poco ainda. E lampinan aki ta percura pa iluminacion y nan ta uza nan como un alternativa na luga di bela, prome cu e uzo di luz electrico a haci su entrada.
Desde 1780 e lampi di Argand a sustitui rapidamente e otro lampinan di azeta di petroleo cu ainda tabata den su antiguo forma basico.
Na nan turno, e lampinan aki a keda reemplasa pa e lampi di kerosin na 1850. Den ciudadnan chikito y den campo ainda a keda uza lampi di kerosin te basta leu den siglo XX, te ora cu finalmente e regionnan aki a haya coriente y asina por a uza bombio. E lampinan mas moderno (manera LPG) a keda sustitui pa esunnan cu ta uza combustible basa riba gas of petroleo cu ta bay den operacion ora e luz no-electrico di emergencia ta necesario. Como tal, nan ta uza e lampinan di azeta di petroleo di awendia principalmente pa e ambiente particular cu nan ta produci.
250 cen-Antiguo fonograf
Fonograf ta un aparato introduci na 1877 pa mecanicamente haci grabacion y reproduccion di zonido. Den su forma desaroya mas despues, nan a yam’e tambe un gramofon (como un marca registra desde ca. 1900). Thomas Edison a inventa e fonograf. E fonograf di Edison tabata esun di prome cu por a reproduci e zonido graba.
325 cen- Antiguo mashin di cose
Elias Howe a patenta e mashin di cose na Merca na 1846. Fuera di Singer y Howe, tabatin otro fabricantenan di mashin di cose na final di siglo 19 y na principio di siglo 20, inclusivo Wheeler & Wilson, cu a gana premio na 1860 pa su mashin pa traha conoscat (knoopsgat) y tabata specialmente conoci pa su trahamento di zom na rand di paña. E mashinnan di pedal tabata varia for di, esunnan cu estilo bieu y simpel di Hemmer cu ta djis pega riba e superficie di un tabla lizo di walnut (walnoot), te na e mashinnan dorna cu plata y perla, di cua e pianan y demas componente pa haci e trabou, tabata scondi tras di cashi di madera decorativo y elegante, pa asina cuadra cu nan status como simbolo di rikesa.