“Si antes tur compania tabata manda carta, recibo, statement y mucho mas via Post, cu tecnologia moderno, tur cos a bira digital. Nos no por keda man crusa y mira e mercado bay laga nos. Post tin un vision nobo caminda nos ta bay restructura y reestablece nos mes riba mercado. Esaki ta trece cune cu Post mester re-inventa, innova y transforma nos servicionan di un forma integral, unda e enfoke ta pa adapta nos mes pa por acomoda e deseonan y exigencianan di nos clientenan. Esey ta precisamente locual mi ta haciendo”, asina Guillermo Raymond, director di Post Aruba N.V. a duna di conoce despues di e protesta di un grupo di empleado afilia na sindicato SEPPA.
A consecuencia di tur tipo di tecnologia nobo, Post Aruba N.V. ta directamente bou di hopi presion, no solamente local, pero tambe internacional pa keda bin cu otro servicionan cu ta produci entrada y ta den nan industria di servicio di entrega. Post lo bira un partner mas instrumental den busca y entrega paki na Aruba mes, como un forma di comodidad pa clientenan. Ya caba, mayoria entrega ta paki, aunke cu mayoria ta bin di afo.
Algun luna pasa tabata na Aruba e Secretario General di Union Postal de las Americas, España y Portugal (UPAEP), Lic. Roberto Cavanna Merchan, pa reunionnan importante cu Post Aruba N.V. y cu Gobierno. E dirigente di e organisacion cu ta conta cu 28 pais miembro, a bisa cu Aruba ta tumando decisionnan importante pa cu modernisacion di servicio postal. Nan tin algun tempo caba trahando cu e director Guillermo Raymond y su personal riba varios aspecto pa eleva e nivel di servicio y agrega servicionan nobo y necesario.
Un di e proyectonan andando ta e certificado di siguridad postal, unda cu lo certifica Post Aruba dentro di poco como un di e paisnan cu tin e miho servicio y procedemento pa loke ta siguridad postal den e region. Den servicio di EMS tambe Aruba a conoce un adelanto enorme. Post a subi di puesto 146 entre 192 pais te na puesto 40, cu ta confirma un servicio di un calidad halto. Tin otro proyectonan pendiente, incluyendo un reunion regional cu tayernan di nivel halto.
“Nos semper tini oido pa tur nos empleadonan y portanan di gerencia semper ta habri. Gerencia tin un bon relacion cu SEPPA y a reuni cu nan den presencia di Minister mr. Drs. Richard Arends unda a aclaria varios inkietud, basa riba informacion incorecto”, di acuerdo cu e director di Post Aruba.
Post Aruba N.V. semper ta trata di mantene tur trahado cu ta cumpli na trabou. Sinembargo e realidad ta si cu e cantidad di trabou a reduci hopi. Post mundialmente ta pasando door di momentonan mas preocupante den su historia. Tur organisacion Postal den region ta confrontando retonan masha dificil te hasta catastrofico. Ta p’esey mas cu nunca awor pa sobrevivencia di Post Aruba N.V., ta hopi importante pa trahadonan y sindicato, traha hunto cu gerencia, pensa hunto, pone schouder bou di proyectonan, pa hunto nos pone Post progresa y mantene cuponan di trabou.
“Mi ta keda kere den e habilidad y sabiduria cu cada un empleado di Post tin pa por pone tur cos un banda y mira e retonan aki como un oportunidad unico pa sigui desaroya nan mes como expertonan den nan trabou mientras nos tur ta reconoce e temponan di aceleracion cu nos ta den”, asina Guillermo Raymond a expresa.
E mes a cuminsa traha 33 aña pasa como partido di carta y a crece den e compania te bira director, conociendo tur funcion, tur structura y procesonan interno. Aparte di reconocimento local, Guillermo Raymond ta conta cu hopi reconocimento internacional pa su conocemento y experencia den e ramo.
A funda e compania priva Post Aruba N.V. na aña 2005. Su oficina principal ta situa na J.E. Irausquin Plein # 9 na Oranjestad y tin 3 oficina adicional na Santa Cruz, Noord y San Nicolas. Post ta ofrece tur tipo di servicio, for di manda un envelop te post pakketten. Post Aruba N.V. ta conta cu 111 empleado, cu diariamente ta yega na 42 mil adres situa tur rond di nos isla. Mas cu djis un servicio, e empleadonan atento ta percura pa tanto comunidad como sector comercial por comunica cu otro. Pa mas informacion riba servicionan di Post Aruba, subi e website www.postaruba.com of check nan pagina riba Facebook.