Dia 3 di juli, Post Aruba a tene un ceremonia pa duna reconocimento na e cuater atleta kende nan cara y e deporte cu nan ta domina cu passion a wordo resalta riba un set di stampia cu a wordo emiti dia 28 di juni, 2019.
E cuater atletanan aki ta Sara-Quita Offringa (Regatista di Windsurf profesional), Xander Bogaerts (Beisbolista Profesional), Shanayah Howell (Ciclista di BMX) y Chiara Petrocchi (Taekwondo), cualnan ta pone Aruba su nomber resona localmente e internacionalmente pa motibo di nan logronan.
Presente na e ceremonia tabata Sr. Guillermo Raymond, director di Post Aruba hunto cu algun empleado, e atletanan Shanaya Howell y su mayornan, Chiara Petrocchi cu su tata y padrastro, mama di Sara-Quita, Sra. Esther Offringa-Williams hunto cu su ruman homber Quincy, y Sra. Brenda Brown, tanta di Xander Bogaerts.
Sra. Vivian Alberto, Manager di e Departamento Filatelico a duna un splicacion amplio di con a yega na e escogencia di e cuatro atletanan pa e serie di Deporte 2019, cual a wordo diseña pa Sr. Armando Goedgedrag.
E atletanan y nan famianan a sinti nan hopi honra y orguyoso cu nan reconocimento y nan ta considera e hecho di a wordo resalta den un stampia, un motivacion pa sigui train y haci nan best y tambe pa inspira otro hobennan pa haci deporte y yuda saca cara di Aruba dilanti.
Sr. Raymond a expresa tambe cu parti di e logro aki ta danki na e mayornan di e atletanan, pues ta nan ta esnan cu ta hiba nan yiunan pa haci e deportenan aki y ta apoyanan pa nan bai dilanti den nan discipilna.
Post Aruba ta haci peticion na pueblo en general pa cumpra e stampianan pa asina nos sigui promove nos atletanan.
A wordo crea un set di stampia y un souvenir vel, kada un cu un balor di Awg.8,80 (4 stampia di 220c) y un envelop di prome dia di emision. Esakinan ta obtenibel na e 3 oficina di Post Aruba cualnan ta situa na Oranjestad, San Nicolas Y Sta. Cruz (MFA).
Pa mas informacion tocante e emision di stampia aki por “like” e pagina di Facebook Aruba Stamps of bishita e pagina web www.postaruba.com