Presidente di Positive Foundation, Julius Penniston (miho conoci como Glen Penn) a lansa recientemente e concepto ‘Aruba Bo Ta Bendiciona.’ Durante un conferencia di prensa a presenta e vision di ‘Aruba bo ta bendiciona’ cu e meta pa crea un -One -Happy -and -Blessed -Aruba. Penniston a menciona cu e meta di ‘Aruba Bo Ta Bendiciona’, ta pa conscientisa cada cuidadano pa realisa con bendiciona cada un di nos ta di ta biba riba un isla maraviyoso. Kier trece e conscientisacion aki a traves di varios actividad cu e fundacion ta bay organisa. Positive Foundation ta bay traha hunto cu varios instancia den nos comunidad pa conscientisa nos hendenan y ‘biba’ ta con Bendiciona Aruba ta.
Michele Brooks, conocido profesional di PJ Consulting Group, ta uni cu Positive Foundation pa lansa e iniciativa di ‘Aruba Bo Ta Bendiciona’. Pa Brooks, e concepto por zona hopi simpel, pero ta uno profundo cu cada ken cu ta envolvi cu e iniciativa aki lo sinti con bendiciona nan ta y lo ta un bendicion pa otro tambe.
E mision di ‘Aruba Bo Ta Bendiciona’ ta pa crece di un iniciativa pa bira un movemento cu ta yuda nos cambia nos manera di pensa, pa influencia nos carácter y pa asina nos por crea y mantene un actitud positivo den tur situacion. Di e manera aki, nos por sinti y biba con bendiciona cada un di nos ta y con bendiciona nos isla ta na tur momento. Pa lansa e iniciativa ‘Aruba Bo Ta Bendiciona’, Positive Foundation ta organisa dos concierto di Gospel. Ambos ta tuma luga diahuebs awor, dia 30 di November y ta conta cu presentacion di artistanan internacional Willy Rodriquez y Susy Juliet. E artistanan local cu ta invita taEltienne Yarzagary, Ramphys Tromp y e duo di Derwin Kemp cu Ron Martis. E conciertonan lo tuma luga na Cas di Cultura.
E prome concierto ta inicia pa 4’or di atardi, y e di dos concierto ta cuminsa pa 7’or y mey di anochi. E prome concierto ta un concierto gratis, specialmente pa nos hendenan grandi. E motibo pakico Positive Foundation kier inicia su actividadnan di ‘Aruba Bo Ta Bendiciona’ cu e concierto aki , ta pa laga nos hendenan grandi sa cu Aruba ta aprecia nan y cu nan tambe ta un bendicion pa nos isla. E concierto ta posibel danki na e cooperacion di varios instancia cu a cumpra e carchi na balor di AWG 35,= pa asina nos grandinan por presencia y disfruta di e concierto di Gospel aki.