Diahuebs ultimo durante tratamento di presupuesto 2018, minister di Husticia, Siguridad y Integracion mr. Andin Bikker a duna presentacion di su presupuesto di cada departamento cu ta cay bou di su maneho. Un presupuesto cu gobierno di AVP mester a entrega na luna di september 2017 manera ley ta prescribi. No obstante a scoge e caminda mas facil y cobarde y a laga esaki cay full bou di responsabilidad di gabinete Wever- Croes.
Esaki ta un di e motibonan cu e presupuesto a dura cinco luna pa ser trata. Minister Bikker su reparticion di cartera, segun e Landsverordening Instellingen Ministeries ta conta cu 13 departamento cu ta cay bou di su responsabilidad di cual DIMAS y IASA cu ta nobo den e constelacion aki.
Durante discusion di presupuesto Minister Bikker a presenta su maneho pa
cambia e LTUV, Landsverordening Toelatig Uitzending en Verwijdering, pa asina haci ley di admision mas transparente, humano pero tambe estricto.
Intencion di esaki ta pa pone mas enfasis riba integracion di migrantenan, maneho cu actualmente ta trahando riba dje. Integracion ta encera cu diferente grupo den sociedad ta yega na otro pa biba den harmonia, adapta su mes na e pais nobo y tambe pa e pais por acepta e migrante como un ciudadano den e sociedad.
Relaciona cu integracion a presenta tambe un mocion durante tratamento di presupuesto 2018 unda ta pidi pa bin cu un ‘integratie toets’. E toets aki ta encera cu e ciudadano nobo mester
siña e idioma Papiamento, Aruba su cultura, historia y tambe norma y balornan.
Cu e exigencia aki lo kier enfatisa riba sostenibilidad di e verlenging di permiso pa un tempo largo y garantisa sobrevivencia di idioma Papiamento conhuntamente cu un servicio debido
na sector hotelero y asina mantene calidad.
E ponencia y escogencia di Minister Andin Bikker ta carga cu mi sosten pa e siguiente motibonan.
E cifranan di Aruba Migration and Integration Survey (AMIS) estudio haci door di CBS y cu ta den su fasenan final pa ser publica, ta mustra e cantidad minimo di migrante cu ta tuma e iniciativa pa siña nos idioma y practic’e.
Ta mas cu claro cu si Aruba kier preserva su idioma, su identidad, norma y balornan mester
implementa e programanan di integracion. Aruba su hendenan ta conoci pa añanan largo pa un
pueblo servicial. Un di Aruba su aspectonan primordial ta e calor di su hendenan cu ta haci
e turista sinti su mes na cas y rondona di siguridad. E cualidad cu Aruba su hendenan por comunica den cuater idioma of mas ta predominante den escogencia pa bishita Aruba.
Mas cu 85% di bishitantenan ta procedente di Estados Unidos y tambe Canada y segun e
rapport di CBS Statistical Orientation di 2015 ta indica un promedio di 57% di habla Ingles.
Por lo tanto ta di suma importancia pa esunnan cu ta yega Aruba pa busca un miho porvenir
, mester por comunica den e idioma Ingles debidamente. Algo esencial pa sigura cu Aruba ta keda den e circulo di un di e miho destinacionnan den Caribe