Recientemente a introduci varios cambio den e leynan di BBO y BAZV cu ta drenta na vigor dia 1 di juli 2018. Den e ley di BBO a incorpora un impuesto nobo yama “Belasting additionele voorzieningen PPS-projecten” abrevia como BAVP y pa e impuesto aki tambe mester haci declaracion. Siguientemente Departamento di Impuesto ta informa tur e comerciantenan encuanto e declaracion di BBO/BAVP y BAZV cu mester yena y entrega pa e lunanan di juli te cu december 2018.
Tarifa valido
Prome cu haci declaracion ta importante pa sa cu e tarifanan valido entrante 1 di juli 2018 ta lo siguiente:
BBO 1,5%
BAVP 1,5%
BAZV 3%
Con ta calcula e impuesto?
E base pa calcula e suma di impuesto ta igual pa BBO/BAVP y BAZV. E base ta e suma total di e volumen di benta di e empresa (bedrijfsomzet). Esaki ta e suma bruto cu e comerciante a ricibi di su clientenan ora el a bende su producto of servicio.
Ehempel: suma total ricibi den luna di juli 2018 ta Afl. 8.000.
(Den e ehempel aki e suma di Afl. 8.000 no ta cay bou di e areglo di dispensacion di impuesto.)
Calculacion di BBO/BAVP y BAZV:
– BBO: 1,5% di 8.000 ta: Afl. 120
– BAVP: 1,5% di 8.000 ta: Afl. 120 +
Total di BBO y BAVP
Afl. 240
– BAZV: 3% di 8.000 ta: Afl. 240 +
Total di BBO, BAVP y BAZV Afl. 480
Declaracion di juli te cu december 2018
Pa e lunanan juli te cu december 2018, Departamento di Impuesto ta pidi tur comerciante pa uza e formulario di declaracion di BBO/BAZV cu nan a ricibi na comienso di aña 2018. Pues Departamento di Impuesto no lo bay otorga un pakete di formulario nobo pa e lunanan menciona.
Con ta yena e formulario di declaracion?
Pa e declaracionnan di e lunanan juli te cu december, Departamento di Impuesto ta pidi tur comerciante pa inclui e suma di BAVP den e suma di BBO y yena e suma total den e formulario di declaracion. Departamento di Impuesto lo tene cuenta cu e suma declara ta encera BBO y BAVP hunto.
Paso 1 Conta e sumanan di BBO y BAVP hunto. Total Afl. 240 (mira e ehempel akiriba) Paso 2 Yena e sumanan di impuesto den e formulario manera ilustra aki:
• E suma di e “Belaste omzet” pa BBO ta igual cu e suma di “Belaste omzet” pa BAZV.
• Pa e lunanan di juli te cu december 2018, e comerciante ta declara e suma total di BBO y BAVP den e hokinan unda ta skirbi “Totaal verschuldigde BBO”. No tin mester di yena e suma di BAVP separa y e suma di BBO separa.
• Despues ta yena e suma di BAZV na “Totaal verschuldigde BAZV”.
• Na final ta conta e sumanan di impuesto hunto y ta skirbi e suma total na “Totaal verschuldigde BBO en BAZV”.
Despues di yena e fecha y firma e declaracion, e comerciante por entrega esaki na Departamento di Impuesto y haci e pago corespondiente. Si ta haci uzo di “online banking”, por uza e “betalingskenmerk” di BBO cu ta menciona riba e formulario, pa haci e pago di BBO y BAVP hunto.
Gerencia di Departamento di Impuesto
22 di juni 2018