Segun Ed Spitzberg Vice Presidente saliente di Afterschool Alliance, experto den desaroya y implementa “Afterschool Programs” pa cada $1 cu bo inverti den Programanan Despues di Scol bo ta gana $9 bek.
Den un Q&A na Universidad di Aruba organisa pa The Centre of Excellence for Sustainable Development of Small Islands (SIDS), na unda invitado di honor Ed Spitzberg a splica e balor di un Programa Despues di Scol pa hubentud, atrabes di un session live caminda tur otro paisa por a sigui e presentacion y tambe haci preguntanan.
Michella Steenvoorde-Laclé y Joseline Croes di partido POR tambe tabata presente pasobra netamente den POR su Vision 17-21 nan tin como Proyecto pa enseñansa extende e orarionan di scol pa ofrece hobennan deporte, musica,arte y cultura te 5or.
Señor Spitzberg a subraya e beneficionan di programanan extra curicular despues di scol. Door di introduci programanan despues di scol bo ta spaar placa paso:
Bo ta reduci crimen hubenil
Bo ta reduci costonan di bijstand
Bo ta stimula e desaroyo social di e hoben
Bo ta stimula e hoben pa tuma mihor decicionan
Bo ta entusiasma e hoben pa siña miho
Bo ta mehora etica di trabou y cifranan di e hoben
Bo ta mehora calculacion y lectura di e hoben
Bo ta reduci e muchanan cu ta redobla aña escolar (zittenblijvers)
E hoben ta den un atmosfera fuera di peliger
Pa un programa pa hobennan despues di scol por ta exitoso tin un serie di factornan cu ta esencial:
– E staff & personal mester ta prepara adecuadamente (un mix di profesionalnan & boluntario)
– E programa mester ta stipula di antemano cu metanan claro
– E programa mester tin cierto sincronisacion cu e scol den dia
– Mester tin partnernan den comunidad cu por ta aliado di e programa
– E programa mester ta uno sano/safe & saludabel
– E studiante mester ti participacion y acceso na e programa
– Por ultimo pero mas importante, mester tin un sistema di evalua y mehora e programa.
Michella Steenvoorde-Laclé ta kere fuertemente den introduccion di programanan despues di scol pa hobenan. Esaki lo brinda tur hoben e oportunidad pa ta mas activo den deporte y desaroya nan parti creativo. Creatividad ta un habilidad importante den e mundo di ciglo 21. Pa e mayornan tambe e tin su beneficionan, ya cu un mayor cu sa cu su yiu ta safe lo ta muchu mas productivo den su trabou. Asina hunto nos por logra hiba nos isla padilanti y tene nos hobennan riba e bon caminda Michella ta finalisa bisando.