Crecemento economico ta trece bienestar y progreso pa nos pais. Minister di Economia Xiomara Ruiz-Maduro, hunto cu Stakeholders a defini 5 area di desaroyo economico cu lo crea mas cupo di trabou y mas negoshinan cu lo paga mas impuesto entre otro. Gobierno awo lo busca inversionistanan cu tin mester pa e 5 puntonan aki wordo reaslisa.
Den cuadro di esaki, tin un Mision Comercial cu lo tuma luga na Colombia. Esaki ta e prome Mision Comercial cu ta sali bou di Gabinete Wever-Croes. Minister Xiomara Ruiz-Maduro ta encabesa e delegacion di Aruba pa e Mision Comercial aki cu lo tuma luga dianan 25 pa 29 di november proximo na varios ciudad di Colombia entre otro Medellin, Cali, Cartagena y of Bogota.
Mision Comercial Bogota ta un delagacion di Reino; Aruba, Corsou, Hulanda y Sint Maarten porta tambe, cu ta bay hunto na diferente luganan na Colombia pa presenta tur loke cu Aruba tin pa ofrece como tambe haya informacionnan necesario di tur tipo di negoshi cu tin eynan.
E mision ta wordo dirigi door di Prome Minister di Hulanda, Mark Rutte hunto cu Minister di Economia Xiomara Ruiz-Maduro di Aruba y Minister di Economia di Corsou Steven Martina.
Gobierno di Aruba ta haci invitacion na sector comercial pa uni na e delegacion aki pa experimenta loke cu Colombia tin pa ofrece pero tambe pa mustra loke cu Aruba tin pa ofrece y loke cu nos kier na Aruba cu e obhetivo pa atrae mas lasonan comercial.
Ultimo fecha pa aplica pa Mision Comercial Bogota ta dialuna 17 di september.
Inscripcion ta bay via Reino. Bo por haci esaki online na: https://www.evitesendmail.nl/missies/col_18/web/col_18_missies.php. Tambe bo por haci esaki via di Departamento di Asuntonan Economico unda por haya tur informacion necesario.