Otro aña escolar yegando su final. Mas cu djis un temporada cu a yega su final nos mester mira esaki como un oportinidad pa colecta informacion, evalua esaki y ta miho prepara pa un temporada nobo. Segun candidato riba lista di POR, Ronny Maduro, cu semper den mente cu e studiante/alumno tin di sali vencedor den esaki.
Mi ta sumamente contento di por a mira resultado di un encuesta haci entre nos maestronan y sigur nos alumnonan. Hopi biaha a debati hopi aspecto di cua rumbo nos enseñansa mester bay, sin tene na cuenta kico ta biba den “veld” mes y sigur e deseo di un participante activo den enseñansa….. nos alumnonnan. Mi kier a elabora riba algun aspecto di e encuesta haci entre e alumnonan di scolnan basico den e caso aki. Nos ta sali for di e punto di bista cu tur hende, alumno, maestro y mayor kier un bon resultado na final di aña escolar! Manera mi a cuminsa na bisa mester colecta informacion di resultadonan y analisa mortibo di un resultado. Pa hopi aña a bin ta scucha opinion y hasta tin biaha discucion den ki idioma mester duna les/instrui nos muchanan na scol. Den e encuesta haci recientemente a resulta cu e mayoria mucha kier haya les na papiamento. Esaki no mester ta sorprendente mirando cu den e mesun encuesta aki ta confirma locual nos a imagina, cu gran mayoria di nos muchanan ta papia papiamento na cas. Esaki ta refleha su mes un biaha mas den e resutado cu si e muchanan ta compronde e lesnan cu e maestro ta splica/duna. Solamente 30% a bisa cu ta compronde tur cos semper y 25% ta bisa di ta compronde tin biaha so of nunca. Pues imaginabo un klas di 30 mucha. 10 mucha so ta compronde e materia totalmente. 10 mucha no ta compronde casi nada of nada y 10 mucha ta compronde casi tur cos, no tur cos! Obiamente nos deseo y tarea ta pa gran mayoria y hasta kisas pa tur mucha compronde tur cos. A yega ora pa nos cambia nos systema di duna les, pa papiamento. Enfoca tur esfuerso y recurso pa esaki sali riba bon pia, cu bon plan, material y sosten pa tur cu ta forma parti di enseñansa. Nos mester respeta deseo di nos muchanan, cu ta papia di curason. Y si ta papia di deseo di e muchanan a sali for di e encuesta tambe cu mayoria ta prefera di traha den grupo y cu gran mayoria lo kier keda scol te 5’or pa actividad deportivo sigi pa musical. Den e milenio nobo aki nos como adulto kisas mester considera deseo di nos muchanan mas enbez di impone un sistema cu aparte no ta nos propio, no ta cuadra den nos communidad, nos pais. Semper cumunicando y considerando e opinion di nos cumunidad, den e caso aki nos muchanan. Nos ta kere cu SI nos POR mehora nos sistema educacional aki riba nos isla.