Departamento di Impuesto ta informa cu e clientenan di winstbelasting por pasa busca nan pakete di winstbelasting di aña 2016. E paketenan ta contene e formularionan di declaracion di aña 2016, esta un formulario di declaracion provisional (voorlopige aangifte) y un formulario di declaracion definitivo (definitieve aangifte).
Na unda por busca e pakete?
Por busca e pakete na Departamento di Impuesto na Camacuri, na e local mas pabou banda di unda ta busca plach’i number di auto. Orario di servicio ta: 7:45 am – 4:30 pm non-stop.
Ta recomendabel pa trece e comprobante di registracion di Camara di Comercio y e persoonsnummer di e empresa pa asina e proceso di otorgamento por bay mas lihe.
Si cliente mes no por busca su pakete
Si cliente mes no por busca e pakete di su empr\resa, e por apodera un otro persona pa busc’e p’e. Den e caso ey mester duna e representante un carta di apoderacion (machtigingsbrief) valido. Lamentablemente Departamento di Impuesto lo no otorga un pakete si no tin e carta di apoderacion.
Procedura pa otorgamento di pakete na un consehero
Ta haci un apelacion na e conseheronan pa manda e lista di cliente hunto cu e cartanan di apoderacion mas lihe posibel via e-mail [email protected]. Pa e lista di cliente ta recomenda pa uza e MS Excel-file ‘Lijst WB-klanten 2017’. Por baha e file aki for e pagina principal di www.impuesto.aw. E fecha final pa entrega e lista di cliente ta bira 7 di April 2017. Na e conseheronan cu ya manda un e-mail: Departamento di Impuesto ta preparando e paketenan, pero e paketenan no lo wordo entrega tanten cu tur e cartanan di apoderacion ta entrega delanta na Departamento di Impuesto. Ora tur cos ta na ordo Departamento di Impuesto lo informa e consehero ki dia e por pasa busca e paketenan di su clientenan.
Departamento di Impuesto ta haci un apelacion na tur cliente y consehero pa di awor caba cuminsa haci palabracion ken ta busca e pakete y eventualmente prepara e carta di apoderacion pa no bin confusion ora di busca e pakete.