Mirando cu temporada di fin di aña ta un epoca bastante druk den e area di Oranjestad, Gobierno di Aruba a dicidi di facilita e stacionamento den centro di ciudad. Di e manera aki ta alivia e fluho di trafico y minimalisa e tempo cu esnan cu tin di bay Playa mester inverti ora di busca un lugar pa parkeer.
E iniciativa aki di Minister di Transporte, sr. Chris Romero, ta pa mantene e ambiente tradicional di fin di aña cu semper a conoce den nos centro di ciudad, di manera cu ta incentiva nos comerciantenan di e area aki y nan bentanan.
E maneho temporal di parkeer stipula pa Minister Romero, ta permiti e bishitantenan di Oranjestad pa haci uzo di e vaknan geel y blanco pa parkeer. Por parkeer gratis henter dia riba diasabra y diadomingo, tanto riba vak geel y blanco, teniendo na cuenta si cu lo tin un cantidad di vak geel destina pa e personanan cu ta paga mensualmente pa nan lugar di parkeer.
Durante siman (dialuna pa diabierna) e reglamentacion di parkeo existente lo keda na vigor.
Mester enfatisa cu durante siman (dialuna pa diabierna) e vaknan geel mester keda accesibel pa e usuarionan cu ta paga mensualmente pa nan luga di parkeer. E orario cu e vaknan geel mester keda na dispocision di e usuarionan cu ta paga pa luna ta di dialuna pa diabierna, di 7 am pa 7 pm.
Aruparking ta keda cu derecho di takel autonan cu parkeer di un manera inconsciente y cu ta prohibi pa ley. Esaki lo bay na costo di e doño di e auto, cu lo mester cana e caminda corespondiente pa haya su vehiculo bek.