CHARLOTTE, North Carolina – Por lo menos un persona a fayece durante disturbionan cu a keda registra na Charlotte (Merca) despues di e morto di Keith Lamont Scott, un AfroAmericano di 43 aña tira mata diamars pa polis.
Hefe di polis, Kerr Putney, a confirma cu un persona a resulta herida durante e protestanan y a fayece algun ora mas despues.
E tension na Charlotte a tuma luga desde oranan di atardi di diamars, ora cu algun polis a mata Scott den e parkinglot di un edificio di apartamento ya cu segun nan, e tabata arma y “a supone un menasa di morto inminente” pa e agentenan.
“E individuo a sali di e auto cu un arma di candela cu a supone di ta un menasa di morto inminente pa e agentenan, cu seguidamente a tir’e mata,” Polis di Charlotte a informa den un comunicado.
E agentenan a acudi na e edificio pa ehecuta un orden di detencion contra otro homber, cual nan no a haya.
Segun CNN, su yiu muhe a indica cu e tata tin custumber di bay cu su auto y lesa un buki y esey ta loke e agentenan a wak y a confundi cu un arma, un buki. E biaha aki e tabata wardando su yiu keda cla cu scol.
Fuente: NTN24/CNN en Español