LIMA, Peru – Por lo menos cuater persona a fayece diaranson den un incendio den un centro comercial na Peru y varios tabata despareci, den un incidente cu a sosode poco prome cu un reunion di e lider y hefenan di Gobierno di e 21 economianan di foro di Cooperacion Economico Asia-Pacifico (APEC).
E incendio a sosode den e centro comercial Larcomar, un di e mas bishita di Lima y cu ta pertenece na e grupo Chileno Parque Arauco. Segun e prome investigacionnan, e candela a tuma luga pa motibo di un corto circuito di coriente.
Autoridadnan ainda ta busca mas victima, director di operacion di bombero, Manuel Vera Romani, a bisa Reuters.
“Nos a haya cuater curpa cu ahogamento y kemadura (…) tin cinco grupo di rescate cu ta buscando den e zona, falta pa drenta den e sala di cine unda cu e acceso ta dificil,” Vera Romani a agrega.
E presidente Peruano, Pedro Pablo Kuczynski, a expresa su “duele” y “solidaridad” cu e famia di e victimanan. “Ta lamentabel e hecho cu ta exigi un investigacion profundo,” e mandatario a bisa atrabes di e red social Twitter.
En tanto, e minister di Interior, Carlos Basombrio, a bisa cu e di acuerdo cu investigacionnan “no ta existi ningun indicacion” cu e incendio lo a wordo provoca di forma intencional. “Esaki no tin ningun relacion cu e situacion di APEC,” el a afirma.
E prome minister Fernando Zavala a bisa cu e prome informenan ta mustra cu tabata pa motibo di un corto circuito.
Hefe di polis di Lima, general Hugo Begazo, a confirma morto di dos hende homber y dos hende muhe y a detaya cu ta existi otro 13 persona atrapa den e kelder di e centro comercial, unda cu ta ubica por lo menos 10 sala di cine.
Coronel di Siguridad di Estado, Jorge Padilla, a bisa periodistanan cu bomberonan ainda ta purba di ingresa pa rescata paersonanan cu lo ta atrapa.
“Den otro ambientenan contiguo tin algun persona, mi no por precisa e cantidad, cu ta aisla. Bomberonan no a yega na e ambiente ey pa por saca nan,” Padilla a splica.
Dilanti di Larcomar ta ubica Marriott, unda medionan local a reporta cu eynan lo hospeda e presidente di Merca, Barack Obama, kende lo yega diabierna na Lima. E embahada Mericano a nenga di duna comentario.
Ademas di Obama ta spera e presencia di presidentenan di China y Rusia y e prome Minister di Hapon, entre otro.
Por lo tanto, e embahada di Reino Uni na Lima, bisiña di e centro comercial, a bisa cu el a cera su oficinanan pa motibo di e candela.
Larcomar a informa den un comunicado cu e causanan di e candela ta wordo investiga y cu el a origina den un di e salanan di cine di e firma UVK Multicines.
Pa resguarda e siguridad di e participantenan di APEC, minister Basombrio a bisa cu nan a destina 11.400 polis pa e evento.
Fuente: Reuters