Internacional: 4 persona a perde nan bida y varios persona herida despues di un tiroteo den un edificio pega cu hospital Francis na Tulsa oklahoma. Tur cos a cuminsa na momento cu autoridad a ricibi un yamada, cu a indica na nan cu tin un persona ta cana cu un arma di candela. No a dura hopi cu e situacion a Sali for di man y e homber a cuminsa basha bala den e edificio.
Ora polis nan a yega e sitio a bin topa cu varios persona cu herida di bala na e di dos piso di e edificio. E edificio ta un compleho medico y e ta un parti di e hospital. No a dura largo cu autoridadnan a bin topa cu e sospechoso benta abou cu 2 arma banda di dje. Tur cos ta indica cu e homber a mata su mes. Esaki ta bolbe marca un otro caso mas di tiroteo cu saldo fatal pa varios persona na Merca