DAMASCO, Siria – Por lo menos 2854 persona a muri durante e luna di Februari na Siria apesar di e tregua na vigor den e pais, un cifra inferior registra na Januari, ora cu nan a anota 4680 morto, Observatorio Sirio di Derechonan Humano, a informa diaranson.
Entre e fayecido den Februari, tin 769 civil, di cual 180 tabata menor di 18 aña y 118 muhe, segun e recuento di ONG.
Mayoria di e victimanan civil, 229 di e total, a muri pa e bomberdeonan di avion di guera Sirio y Ruso, mientras cu otro 89 tabata victimanan di atake di artiyeria di forsanan leal na presidente Sirio, Bachar al Asad.
Otro dies civil a muri como consecuencia di e torturanan padeci den e prisonnan gubernamental, segun e comunicado.
E observatorio a detaya cu 125 civil a muri den e bombardeo di avionnan Turco, otro nuebe den e atake di e guardia fronteriso di e pais aki y 59 tabata victima di atakenan aereo di e coalicion internacional, lidera pa Merca.
Otro 44 civil tabata victima di morteronan lansa pa faccionnan Islamico, otro nuebe a wordo ehecuta pa e grupo terorista Estado Islamico (EI), incluyendo dos mucha y 49 a muri pa e explosion di auto bom.
Den e banda gubernamental, tabata tin 299 morto, mientras cu a muri 830 integrante di e diferente faccionnan rebelde, entre nan e Forsanan di Sirio Democratico (FSD), un aliansa Kurdo-Arabe respalda pa Merca.
Di un otro banda, por lo menos 661 integrante di gruponan radical a perde nan bida, entre nan EI, e Organisacion di Liberacion di Levante, agrupacion crea en torno na e exfilial Sirio di Al Qaeda.
Siria for di casi seis aña tabata escenario di un conflicto cu a causa mas di 260 morto, segun e Observatorio.
Fuente: El Espectador