BADAKHSHAN, Afganistan – E cantidad di morto door di varios motibo provoca pa e temporal di sneeuw na Afganistan a aumenta diadomingo na 108, entre dificultadnan grandi pa haci trabaonan di rescate debi na e desviacionnan di caminda, fuentenan oficial a informa Efe.
E zona mas afecta pa e temporal aki cu desde tres dia pasa a azota Afganistan ta e provincia oriental di Nuristan, unda cu un tempestad a arasa di madruga un pueblo remoto y a caba cu bida di 46 persona y a herida 20, Mohamed Moosa Shami, vocero di e gobernador regional a indica.
E fuente a señala cu e ekiponan di rescate no tabata por a yega na e localidad pa motibo di e caida di comunicacion y cu bisiñanan ta purbando di saca e hendenan cu ta atrapa.
Den e mesun zona, ocho persona a muri den otro dos pueblo pa motibo di e tempestad sin cu e ekiponan di rescate a yega.
E region remoto di Badakhshan tambe a resulta hopi afecta, cu 22 morto ayera den varios avalancha y e careteranan di 12 districto di e zona cera, Navid Farotan, vocero di e gobernador provincial a bisa.
Den e provincia di Parwan, colindante cu Kabul, 12 persona a fayece pa motibo di dos avalancha, Wahid Sediqi, vocero di e gobernador di e region a comunica.
“Nos a manda ekiponan di rescate na e zonanan afecta,” Sediki a remarca, kendenan a añadi cu trinta cas a wordo distrui pa e tempestad.
Di su parti, e mal tempo a cobra bida di seis persona den e provincia norteño y insigur di Sar-e-Pol, segun e vocero di Ministerio Gestion di Desaster di Afganistan, Omar Mohammadi.
Otro cinco persona a fayece den e parti occidental Herat, unda un cantidad importante di cas a keda distrui, Jaulani Farshad, vocero di e gobernador provincial, a splica.
Den e meridiona Khost, tres persona a perde nan bida y dos den e ciudad oriental Logar.
Mohammadi a detaya cu e sneeuw a blokia numeroso caretera den henter e pais, en especial e autopistanan Kabul-Balkh y Kabul-Kandahar, cu ta sigui cera pa di dos dia consecutivo, loke ta impedi ekiponan di rescate yega na e areanan afecta.
“Nos lo cuminsa haci e careteranan limpi ora cu e tempo mehora, ya cu e ta sigui yoben den varios zona,” Mohammadi a afirma.
E mal tempo a obliga cancela tur vuelo di e aeropuerto di Kabul, cu lo reanuda una bes cu e pistanan, e vocero di Autoridad Civil di Aviacion, Qasim Rahimi, a anuncia.
Gobierno a dicidi declara e diadomingo festivo debi na e mal tempo, e camindanan kibra y otro problemanan causa pa e sneeuw, Shah Hussain Murtazavi, vocero di e presidente Afgano, Ashraf Gani, a bisa Efe.
Fuente: NTN24