Pa por soluciona e problema di ilegalidad POR den gobernacion lo mehora proteccion di nos costanan enfocando riba uzo di tecnologia di ultimo tempo, (entre otro drones, radar, “bio-technology”) iluminacion den areanan vulnerabel y vigilancia cu helicopter.
Ademas, ta introduci un maneho stricto di admision di stranhero nobo pa limita e posibilidadnan di estadia ilegal riba nos isla. Ta intensifica maneho di Warda Nos Costa pa gara y expulsa esnan cu ta drenta na forma ilegal, lider di POR Otmar Oduber a splica.
Banda di un maneho efectivo cu ta garantisa seguridad y bienestar di nos ciudadanonan, lo introduci castigonan mas severo y inmediato contra tur cu atenta contra nos bishitantenan. Aruba te ainda ta depende pa 92% riba turismo y seguridad ta un di e aspectonan principal cu Aruba ta logra di atrae e turista pa Aruba, e situacion ta importante y POR ta tuma esaki na serio. Si reforsa y modernisa Scol pa Polis, e ora por cumpli cu demanda cu comunidad pa mas polis y e necesidad pa recapacitacion continua di nos agentenan policial.
Den POR su Plan di Accion por haya mas informacion riba Husticia y otro temanan manera medio ambiente, educacion, salubridad, deporte, infrastructura, labor entre otro. Temanan cu POR ta reconoce nan balor y ta mustra e plan cu tin pa desaroyo riba cada un di e temanan aki.