Dialuna awor, dia 3 di december, Departamento di Impuesto ta cuminsa acepta pago di impuesto di vehiculo di motor di aña 2019. Asina departamento di impuesto DIMP a informa. E diferencia ta cu contrario na e añanan anterior, e plachi mes ta wordo otorga na januari 2019 envez di december 2018 caba. E clientenan cu tin un number di e categorianan A, TX, DT, B, O, MFA of V por scoge pa paga e impuesto den un of dos biaha. Por lo menos e prome mita di e impuesto pa tur categoria mester ta paga no mas laat cu dia 31 di januari 2019. E clientenan cu tin number personalisa y e motociclistanan mester paga e impuesto di 2019 den un solo biaha.
E clientenan cu ta paga via banco mester menciona e nomber completo, persoonsnummer, e number di e plachi (p.e. A-82000) y e periodo di pago. E suma total mester inclui e suma di impuesto y e suma di gasto di plachi.Ta importante pa menciona cu e tarifa di impuesto 2019 a keda mescos. Ta bon pa tene na cuenta cu no ta posibel pa paga e impuesto di aña 2019 si no a paga e impuesto di e aña(nan) anterior.Finalmente Departamento di Impuesto ta recorda cu pa 2019 lo reintroduci e plachinan di number y lo no uza e “controle sticker” mas. E gastonan lo ta Afl. 12 pa e plachinan grandi y Afl 8 pa e plachinan chikito. Si ta paga e prome mita di aña, mester paga Afl. 12 pa e plachinan. Si ta paga ful aña e gasto total di e plachinan ta Afl. 20.Actualmente e plachinan di number no ta disponibel. Lo anuncia na comienso di aña 2019 ki momento por pasa busca esakinan.Departamento di Impuesto ta recomenda pa haci e pago mas lihe posibel. E cantidad di automobilistanan ta grandi y pesey ta recomendabel pa no warda te na ultimo momento.