Presidente di Fundacion di Cancer di Prostat, Sr. Jurgen Benschop ta splica tocante e edad unda por cuminsa haci testnan tocante cancer. Si un persona tin cancer di famia, ta bon pa cuminsa haci test na 40 aña y si no tin cancer den famia, lo por cuminsa na 50 aña. E test mas simpel ta un test di PSA, caminda cu via di sanger, via huisdokter y laboratorio por haci test di con halto e PSA. Te cu cuater e PSA ta bou di control, si e ta riba cuater esey no kiermen automaticamente cu tin cancer, pero si mester laga haci testnan avansa.
E testnan aki por ta diferente, pero e dokter di cas lo manda e pashent pa un oncoloog, cu lo haci testnan mas avansa.
Sr. Benschop ta sigui splica cu hopi biaha un persona no sa sigur si e tin un famia di dje cu tin cancer den famia. E tema di cancer te ainda ta taboo aki na Aruba. Sr. Benschop a splica cu e mes su tata a muri di cancer di prostaat, y el a biba esaki di cerca. Si bo ta na tempo y busca tratamento na tempo, e ta curabel. Mayoria di hende ta warda te ora nan haya dolor, y hopi biaha esaki ta laat. Un cancer den prome fase no ta bay duna dolor, pero ta manda sintomanan. P.e. no ta urina bon, ta sinti cierto cosnan diferente den bo curpa. Esey no kiermen automaticamente cu tin cancer. Pero tambe tin prostatitis, dus cu e prostaat ta hincha.
Pero ta recomendabel pa haci un test y bay haci e testnan na laboratorio. Si ta necesario, lo manda e persona pa un oncoloog, si en caso esaki ta necesario.
E comision a haci diferente charlanan na diferente instancianan, y no solamente ta dirigi ariba e ser masculino, pero ta betrek e pareha di e persona aki tambe. Ta hopi biaha ta e pareha ta esun cu ta pone presion pa asina e ser masculino bay haci e test pa tur siguransa.
Si cuminsa na un edad mas jong, cu e comunidad por crece y biba un bida mas sostenibel y un tratamento na tempo pa e malesa aki. Fundacion di Cancer di prostaat lo bay tene mas charla y por inscribi na Wilhelmina Kanker fonds pa e charla. Esaki lo ta dia 25 di Maart, den ballroom di Alhambra.
Na Aruba y na nivel mundial, e cancer di prostaat despues di cancer di cuero ta esun mas comun bou di hende homber. E fundacion a haya donacion di diferente organisacionnan, y pa esaki a traha un flyer hunto cu e dokternan di cas, unda ta pone informacion disponibel na e consultorionan. Pero tambe e fundacion tin un Facebook page y tambe un webpage. Por tuma contacto cu un di e miembronan, ya cu mayoria miembro di e fundacion ta personanan cu a pasa aden. Solamente un pashent por splica kico tur por spera ora di cancer di prostaat y su tratamento. Asina Sr. Benschop a finalisa bisando.