E proyecto di Dreamers cu gobierno y DIMAS a bin cun’e den luna di Mei tin valides te cu fin di Juni pa cual aki Mr. Kathy Ruiz-Paskel directora di DIMAS ta splica mas.
DIMAS a haci dos sesion informativo y e informacion ta disponibel ariba website di DIMAS, como tambe e formularionan. Tambe ta haya brochurenan den tres diferente idioma. Sra. Ruiz- Paskel ta bisa cu nan a haya un response hopi grandi ariba esaki y tin 100 persona cu a entrega fisicamente nan peticion. Siman pasa DIMAS a entrega e prome dos personanan nan permiso di proyecto Dreamers.
Lo sigui tuma aplicacion pa cita pa proyecto Dreamers ta cu fin di Juni. ta importante pa recorda cu e proyecto aki ta dirigi na e muchanan, of hendenan cu tin mas di 10 aña na Aruba. No necesariamente tur aña cu permiso, pero si cu nan por comproba cu nan tin 10 aña biba na Aruba, y di cual 5 di nan, biba aki na Aruba como menor. Cu nan a bay scol basico y/o secundario na Aruba.
E persona cu ta kere cu e ta fit e scope akinan y ainda e no a aplica, y tampoco a haya e firma liber ainda, door di a cana e proceso regular su mes, e persona aki por bin aplica pa bin na remarca pa e proyecto y firma liber den proyecto Dreamers. Ta pidi pa toch aplica pa un cita y e lo wordo acomoda pa un cita. Na prome instante a keda di acomoda pa cita ariba un diabierna, pero mirando e gran interes, a dicidi di acomoda e citanan tambe ariba diamars.
Personanan cu no a yega 10 aña ainda, tambe por aplica pa e proyecto Dreamers, pero Sra. Paskel a splica cu e proceso regular ta cu cada mayor mester percura pa nan yiunan si nan ta rekeri di permiso, pa nan regla esaki anualmente. For di e punto di bista aki, si e mayor pone tur su papelnan na ordo, y anualmente e pidi, e tambe pa e yiu ey tambe lo yega 10 aña y e yiu tambe lo haya su firma liber na su debido tempo.
Pero e proyecto aki a defini un scope y a duna oportunidad na esunnan cu pa un of otor motibo no a logra regla esaki den e tempo cu a pasa. Dus personanan cu por comproba cu nan tin dies aña caba, na momento di ehecucion di e proyecto, pero si tin mas di 5 aña por aplica pa e proyecto aki. Tur otro caso mester cana e trayecto regular.
Tin hopi mayor cu ta mustra di ta ilegal ariba nos isla y a puntra Sra. Ruiz- Paskel con DIMAS ta bay atende cu esaki pa cu e grupo aki.
Sra. Ruiz Paskel a splica cu a dividi e gruponan den dos, esunnan cu ta mayor di edad caba y cu por a comproba cu nan a drenta como menor etc., nan no a pone como rekesito cu nan mester ta legal. Pero nan mester comproba cu nan tin 10 aña na Aruba, di cual 5 ta como menor. Pero como condicion lo bin acerca cu ta check cu Ministerio Publico pa check si nan no tin un record criminal riba nan nomber.
Esunann cu tabata menor di edad, si e parti unda cu mester tin un mayor cu ta responsabel y cu mester tin un estadia legal na Aruba, e mester por mustra cu e ta e representante legal.
No ta e bedoeling cu tur hende cu no tin permiso, bin haya un permiso. E tabata dirigi ariba un grupo specifico. Ariba e prome anochi di informacion a bin un grupo grandi y eynan ta un area cu mester dedica.
Di parti DIMAS y di parti di Ministerio, a mira e necesidad pa duna mas informacion, con un hende mester encamina e proceso den un forma regular. Den e dianan binidero, lo tin sesionnan di informacion regular y esey lo wordo anuncia proximamente.
Sra. Ruiz Paskel a splica cu algun anochi di informacion a wordo haci den combinacion cu Departamento di Labor, y nan tabata tin algun fecha planea, pero esaki nan a wordo cambia y e fecha exacto lo wordo anuncia despues.