Sr. Otmar Oduber, lider di POR tabata sumamente contento cu resultadonan di eleccion pa su partido cu apenas ocho luna di existencia. E ta amplia mas ariba esey.
E ta un satisfaccion sumamente grandi, pa bay den pueblo y gana nan confiansa. Esaki tabata un eleccion sumamente diferente cu hopi otro eleccion, mirando e cantidad di hendenan cu a keda sin bay vota. Pueblo a rechasa corupcion, pueblo a rechasa un integridad cu su integridad ta na suela. Pueblo a rechasa e gobierno cu su integridad te na suela.
Den historia di politica na Aruba, ta keda marca un gobierno ta bay un eleccion caminda cu tin un minister encarcela, sin cu e prome minister a tuma e pasonan necesario. Esey ta un señal tambe cu comunidad di Aruba a perde hopi confiansa den su politica y su gobernantenan. Tarea ta cuminsa ta uno di recupera e confiansa di gara e señal cu a wordo manda di comunidad. POR a hiba un campaña habri y transparente, lo mester percura pa recupera e confiansa di Aruba.
Segun Sr. Oduber, den un pais cu democracia ta biba, e dos partidonan grandi ta e prome nan yama pa forma un gobierno y carga nan responsabilidad. Y si nan no ta carg’e, POR ta preparando nan dos representantenan pa Parlamento di Aruba. Pero lo mester warda e resultadonan individual, mirando cu POR tin un protocol firma pa loke ta trata esunnan cu lo bay sinta den Parlamento y si nan wordo yama pa carga e responsabilidad. Semper nan lo ta dispuesto ya cu nan tin un programa bon hinca den otro. Sr. Oduber hunto cu su 28 coleganan a hinca hopi tempo den e programa di gobernacion y a percura pa trece e mensahe pa Aruba.
Partido POR den apenas ocho luna a logra haya dos asiento, mientras e otro tres partidonan cu a saca asiento, ta partidonan cu tin mas di dies aña di existencia. Pero pa nan di POR e resultado ta uno hopi satisfactorio. Sr. Oduber a sigui bisa cu nan a wordo censura door di medionan di comunicacion tanto scirbi, como tambe radio emisoranan. Lo mester percura pa cambia esaki, ya cu democracia ta wordo carga door di periodismo, door di esunnan cu mester hiba e informacion pa comunidad. Lo mester bay traha ariba esaki hunto cu trece integridad bek den gobernacion y trece transparencia bek den Parlamento.
Lider di partido POR, Sr. Oduber a sigui bisa cu den ocho luna di tempo, nan a haci e trabao cu nan mester a haci. Partido ReD semper tabata tin nan base cu semper a apoyanan, den nan 10 aña di existencia. El a sigui bisa cu partido RAIZ, cu a bin cu un politica diferente, a haya sosten den comunidad, kisas no suficiente y sigur tin derecho di existencia. Partido ReD tin un grupo di siguidor diferente na POR, pa cual POR lo mester traha pa bo siguidonan.
Encuanto e hibamento di campaña cu bandera y stickernan, partido ReD a logra di saca un asiento sin a hiba e campaña tradicional y lider di POR ta di opinion cu lo mester poco poco yega na e punto aki.
Un 90% di e votadonan no tabata sinti nan mes identifica cu otro partidonan, nan tabata sinti nan mes intimida door di gobierno. E comunidad a sinti debor di e forma di hiba campaña aki y por a wak esaki refleha den e cantidad di abstencion cu tabata tin e aña aki.