Despues di un temporada di vakantie, Pop Up-Clean Up ta organisa un limpiesa di mondi na Santa Cruz. E biaha aki ta toca turno na e mondi den vecindario di Shete. Diadomingo awo dia 11 di September di 8:00 am pa 11:00 am nos ta spera comunidad di Aruba pa duna un man na e habitantenan di Santa Cruz pa trece bunitesa bek na nos mondinan.
Durante combersacion cu e habitantenan di e vecindario di San Fuego y Shete ta ripara cu nan ta un comunidad cera. Tur bisiña eybanda ta haci lo necesario pa mantene e naturalesa limpi. Pero jammer genoeg nan ta constata cu e tours y hendenan cu ta bay off road ta pasa y tira nan sushi den e mondinan eybanda y tambe den parke. Tambe por mira cu tin cierto habitantenan cu tin hopi rommel rond nan cas y di eynan sushi ta keda para y forma un mahos bista pa e habitantenan y e turistanan cu ta pasa eybanda. E mondinan no por haci nan mes limpi, pesey Pop Up Clean Up ta pidi ayudo y asina mustra un bon ehempel pa nos comunidad.
Pop up Clean up ta conta cu ayudo di AHATA, Fundacion Aruba Limpi, Aqua 48, Wings Global Media, JetYoga y Ecotech. Y sin laga afo nos boluntarionan cu ta bin riba nan diadomingo mainta y duna un man. Ta consehabel pa bin cu handschoen (aunke tin pa fia), boter di awa, sapato cera y proteccion contra solo. Tur esnan cu ta participa ta haya un LES GRATIS di YOGA. Nos ta warda tur cu tin amor y ta wak e importancia di mantene nos naturalesa pa bin diadomingo awo pa 8or na Shete pa hunto nos combati e sushi y cambia e mentalidad! Pa mas info bishita nos facebook pagina Pop Up – Clean Up.