Boneiro: For di 4 di aprel 2025, Kuerpo Polisial Hulanda Karibense (KPCN) ta bai usa “bodycams” ofisialmente na Boneiru, Sint Eustatius i Saba. Ku e paso aki, KPCN ta fortalesé seguridat, transparensia i konfiansa entre polis i komunidat.
Mas protekshon pa e siudadano i agente polisial
“Bodycams” ta un kámara chikí ku e agente polisial ta bistí visibel riba su unifòrm. Nan ta hasi uso di dje den, por ehèmpel, kòntròl, akshon di mantenshon di lei, intervenshon i otro trabou operashonal. E teknologia aki ta graba situashon ophetivamente, ta stimulá akshon profeshonal i ta yuda redusí tenshon.
Pa e siudadano, e “bodycam” ta ofresé un seguridat èkstra ku nan interkambio ku polis lo bai na un manera hustu i kuidadoso. Pa e agente polisial, e imágennan ta fungi komo protekshon den kaso di situashon no masha kla òf keho. Ademas, e grabashon ta hasi posibel pa analisá insidente i mehorá akshon profeshonal konstantemente. Eksperensianan internashonal ta mustra ku “bodycam” ta fortalesé konfiansa mutuo i ta redusí kantidat di insidente.
Reglanan kla i liña di guia pa privasidat estrikto
KPCN ta usa “bodycam” segun protokòl kla. Agentenan ta bisti e kámara visibel i ta indiká ora nan kuminsá graba, por ehèmpel, dor di menshoná esaki verbalmente òf via un señal di kámara.
Ta warda e imágennan seif i ta hasi uso di dje solamente pa investigashon i tratamentu di keho ku regla di privasidat estrikto, kaminda solamente trahadónan outorisá bou di kondishon spesífiko tin akseso. E periodo ku ta warda e imágennan ta limitá i ta eliminá e imágennan ku no ta nesesario despues di un tempu.
Mas informashon?
Bo kier sa kon “bodycam” ta funshoná, ki ora ta hasi uso di dje i kon KPCN ta trata bo privasidat? Bishitá nos wèpsait: https://www.politiecn.com/pap/topiko/bodycam-na-hulanda-karibense.html
