Finalisando nan 4 añanan di estudio na Academia di Husticia, Agente policial Gislen Richardson, Nikita Ridderstaat, Jeyson Caceres y Luis Carlo a uni forsa pa realisa un proyecto den cuadro di nan estudio tocante di sushedad den naturalesa, specificamente “Grofvuil”. Ta trata aki di sushi manera stoof, frishider, wasmashin, stoel, sofa etc. E grupo aki a opta pa scoge e tema aki pa motibo cu durante patruya nan a topa cu diferente area sushi y alabes nan ta haya diferente keho cu ta drenta tocante personanan cu ta tira sushi den mondi.
Tur sushedad den mondi tin consecuencia pa medio ambiente, pa naturalesa y nos calidad di bida. E ta trece bestia y insectonan no desea, e ta stroba e habitat di bestianan cu ta biba den mondi, e ta trece enfermedad, ta atrae mas sushi y tambe ta stroba pa hende por disfruta, relaha y recrea den naturalesa. Fuera di e consecuencianan ya menciona, e gas of material cu e productonan aki ta traha cune tambe tin consecuencia pa e medio ambiente y nos bida.
Despues di analisa e motibo y consecuencia a opta pa haci un accion di limpiesa den dos bario den Noord, cu ta Turibana y den e area di casnan di pueblo na Noord.
Despues di a haci e accion di limpiesa, a sigui pa e siguiente plan cu ta incorpora reciclahe den e accion. A recoge 7 ton di hero y 10 saco di 60 galon yena cu plastic tambe producto nan di plastic, e hero a bay pa Daltra N.V. y e plastic Ecoplas Aruba. Esaki a haci cu menos sushi a bay dump na Parkietenbos.
Den e mesun siman a parti diferente foyeto pa e habitantenan pa asina conscientisa nan pa hunto nos por tene Aruba limpi. No solamente pa mantene e medio ambiente limpi, pero pa nos mes tambe como ser humano. E reaccion di e habitante y e pueblo di Noord tabata positivo y contento.
E studiantenan ta gradici Mariniers Kazerne hunto cu Formacion Social, City Inspector, Serlimar, Ecotech, DOW, Do It center, Aruba Trading, Total Cleaning Aruba y coleganan di Cuerpo Policial Aruba cu hunto a duna un man pa tene Aruba limpi.
Polisnan ta activo riba tur tereno y medio ambiente sigur ta un di nan. Ta prohibi pa tira sushi den mondi segun nos codigo penal y tin un boet mara na esaki. Si abo mira un persona tira sushi den mondi, yama Polis, tuma e number di auto, color, marca etc. Mensahe di e Polisnan hoben ta pa nos tur yuda tene Aruba limpi! Un Aruba limpi ta un Aruba dushi.