Dialuna merdia bisiñanan atento na Bakval a nota movecion sospechoso di un auto Honda preto den e bario y despues ta nota cu e auto a para na un cas y 3 homber a baha y tawata saca cos pa loco for di e cas pa despues sali cu e auto duro bay.
E bisiñanan a avisa central di polis mesora di e movecion sospechoso. Di biaha central ta dirigi e patruyanan di Noord pa e sitio y pa paga tino riba un auto Honda preto cu 3 homber aden. Banda di Cafe 080 un patruya ta wak e auto y ta dune señal pa para pero aki e auto Honda Fit preto ta sali duro bay.
Bandi ex Motin Bar e auto ta drenta un caminda di santo bai zuid y un tiki mas lew e sospechosonan ta baha for di auto y drenta mondi na pia lagando e auto atras. Mas unidad di playa, strand, flex, k9 y otro unidadnan a bin duna un man cu e buskeda. Un rato despues ta drenta un melding cu na un adres na Alto Vista cual ta un poco mas pabou di e mondi cu e sospechosonan a drenta, un persona na su cas ta wak dos homber canando den su cura y cu nan kier kibra e porta pa drenta paden.
Mesora e patruyanan ta bai na e sitio y na yegada e dos homber nan aki ta cuminsa core pa polis. Polis a logra gara un. E otro unidadnan a sigi cu buskeda eybanda mientras dos patruya a keda warda pa dogcatcher bin busca e detenido. Para eynan wardando dogcatcher e polisnan ta nota e otro sospechoso drumi bow di un auto cora. Polis a logra detene mesora.
Den e buskeda polisnan a logra haya varios articulo cu lo ta posibelmente horta. Departamento Forensico a presenta na e adres na Bakval pa tuma evidencia y lo bay tuma evidencia riba e auto Honda Fit tambe. E dos detenidonan un di fam T. y un di fam W. lo tin cu bai duna cuenta ken e otro sospechoso ta cu tawata hunto cunan.