Polisnan a cana cu bandera di FIFA p’e wega final

Arubaanse Voetbal Bond (AVB) tabatin un sorpresa pa tur hende durante e ultimo wega di campeonato 2018/2019 Lifida U-11 Plata. E mainta aki a laga 4 Polis cana cu e bandera di FIFA pa duna inicio na e wega di final.

Mirando e responsabilidad social y deportivo di cada organisacion, AVB a acerca Cuerpo Policial Aruba (KPA) puntrando pa nan ta presente na final di e campeonato y carga e bandera di FIFA. Mesora a acepta esaki, mustrando cu Polis tambe ta amigo di tur nos muchanan cu ta haci deporte.

AVB semper a conta cu presencia di Polis durante weganan di futbol pa yuda mantene ordo, pero e biaha aki nan tabata presente pa un momento social.

Directiva di AVB ta gradici Kenneth Phillips, District Chef di Oranjestad, pa nan participacion pero tambe na e agentenan cu tabata presente pa sostene e muchanan den deporte.

Comments

comments