Comunidad a wordo conmovi diamars ultimo ora cu dos antisocial a drenta cas di un famia cu arma den man y a kita bida di un persona y laga otro herida.
Minister di Husticia mescos cu tur cu ta forma parti di nos comunidad, a keda sumamente conmovi y na mes momento a cuminsa atende cu autoridadnan cu ta cay bao di su Ministerio, pa mira con ta resolve e caso serio aki y na mes momento busca un forma adecuado con por preveni cu e tipo di actonan aki ta sigui tuma luga.
“Cualkier caso caminda trankilidad y privacidad di un cas di famia ta wordo viola, ta algo serio y den e caso aki un persona a perde su bida y otro a keda herida.
Ta mas cu claro cu nos tur cu ta forma parti di e comunidad aki, ta keda afecta y preocupa cu e tipo di actividadnan aki, caminda siguridad di nos hendenan ta na peliger pa mal comportacion di un grupo chikito di antisocial cu ta abusa di e trankilidad di nos hendenan.
Tur departemanto di husticia ta trahando na tur momento no solamente pa soluciona crimennan contra sociedad pero tambe ta haciendo lo maximo pa actua den forma preventivo.
Sinembargo pa esaki bira mas efectivo, autoridadnan hudicial por logra mucho mas cu sosten y ayudo di nos comunidad, caminda nos tur ta bira wowo di husticia, denunciando cualkier situacion sospechoso cu nos por tuma nota di dje of a scucha.
Nos tur mester biba mas consciente di loke ta pasando rond di nos, den nos bario, riba comportacion straño di nos bisiñanan y di esunnan den nos bario ya cu e ta forma mas efectivo pa autoridad bira actua mucho mas preventivo.
Ta di lamenta cu ta un grupo chikito den nos comunidad ta causante di e susto grandi aki y e forma con nos por para e grupo aki, ta di uni forsa hunto cu autoridadnan hudicial y asina pone man riba e hendenan aki si por, prome cu nan comete na fechorianan.
Nos tin cu traha hunto, nos tin cu lucha hunto y mas cu tur cos, nos tur mester ta mas atento na e tipo di desaroyonan aki, y semper keda atento pa cualkier comportacion sospechoso di e antisocialnan aki.
Departamentonan di Husticia tur dia ta trahando hunto no solamente pa soluciona crimennan pero tambe pa preveni esakinan y ta sumamente dificil pa anticipa comportacion malo di algun hende cu no ta respeta regla y leynan di nos comunidad.
Ta den e cuadro aki nos tur tin cu bira mas atento, nos tin cu bira mucho mas alerta di loke ta pasando rond di nos, sea den nos bario, na un evento social of deportivo, caminda cu lo por topa cu tiponan cu ta mustra sospechoso den nan comportacion. Dor di alerta autoridadnan cu e sospechonan aki, e lo por yuda na preveni cu e tipo di abusonan grandi aki ta tuma luga.
E crimennan contra comunindad tin cu wordo combati cu cooperacion di comunidad caminda nos tur por duna autoridad un aporte esencial den prevencion di e cosnan malo aki,” Minister di Husticia Arthur Dowers ta declara.