CARACAS, Venezuela- Guardia Nacional Bolivariano di Venezuela (GNB) diaranson a lansa bomnan lagrimogeno contra di al menos dos manifestacion di oposicion na Caracas, unda cu miles di persona a participa, riba un autopista cu ta pasa dilanti di e base militar la Carlota.
Agentenan di GNB (polis militar) a tira gasnan lacrimogeno den e zona di e capital Venezolano aki, caminda cu varios shen manifestante tabata situa y algun di esakinan a responde cu molotov cocktail (bom casero) y piedra.
Mas trempan, otro grupo di ciudadano cu tabata congrega den e zona west di Caracas a wordo gespart for di otro cu gasnan lacrimogeno di parti di GNB. Pero e manifestantenan aki a bolbe uni.
Diaranson miles di persona a concentra den varios parti di e capital Venezolano basa ariba e yamada di e lider opositor, Juan Guaido, reconoci como presidente interino di Venezuela pa mas di 50 pais.
E manifestacionnan riba caya contra di gobierno di Nicolas Maduro, cu tambe a wordo registra den varios ciudad di e pais, a bin 24 ora despues di e levantamento cortico di un grupo di militarnan na Caracas. Esaki a desata un dia di protestanan violento cu a termina cu’n saldo di al menos 80 persona herida.
Di otro banda, simpatisantenan di Chavismo a concentra nan mes den centro y west di Caracas pa participa den e actonan convoca pa e gobierno den cuadro di 1 di mei, dia di labor.