Cuerpo Policial a anuncia un accion di listramento preventivo (“preventief fouilleren”) den cooperacion cu Ministerio Publico, hunto cu Cuerpo Especial Arubano y D.T.P., e departamento di transporte publico. A scoge e anochi di 28/29 di october pa e accion aki mirando cu lo tabatin hopi hende riba caya pa e celebracion di Halloween, combina cu hopi otro actividadnan cu tabata programa pa fin di luna. E enfoke di e accionnan tabata e area di hotel.
E accion a tuma luga for di 6or di atardi diabierna, te cu 6or di mainta diasabra y a conta cu participacion di 34 Polis, cu ta di e unidadnan K-9, motoriza, RRT, Flex-Team, Maritiem Politie y e personal di districto di Noord.
Polisnan a subi caya y a cuminsa controla autonan dilanti di “Do It Center” na Noord, unda cu a para un cantidad considerabel di auto pa controla esunnan cu ta den dje riba posesion di arma di candela. A controla tambe si tur vehiculo y chauffeur tabatin e documentonan necesario. Esaki a resulta den un cantidad chikito di procesverbaal y a tuma algun auto den beslag pa falta di e documentonan.
E team di Maritiem Politie a laga sa cu nan a para un auto cu 4 persona aden y cu nan lo bay haci uzo di e derecho pa listra e personanan y e autonan. E incidente a tuma luga pa mas of menos 10or y mey di anochi. Como cu e personanan den e auto a cuminsa bira hopi nervioso, a pidi pa refuerso y a resulta cu e pasahero J.A. Bislik tabatin un revolver den su saco di carson. A detene tur cuater persona y a transporta nan pa Warda di Shaba, unda cu nan a keda deteni riba orden di Sub Fiscal pa mas investigacion.
Miembronan di e Unidad Motoriza a detene 7 persona cu tabata coriendo auto bao di influencia di bebidanan alcoholico. Tur shete a wordo getest ora a para nan y pa tur shete e resultadonan a sali malo.
D.T.P. a enfoca riba transporte publico, cual ta inclui autobus, bus, taxi y e busnan di paranda. Nunca antes D.T.P. a participa na e acionnan aki den districto y e tabata pa tur unidad cu a participa un experiencia nobo. Lo agrega e team di D.T.P. den futuro cu mas frecuencia den e acionnan aki.
E di dos accion di listramento preventivo a tuma luga for di 6or di atardi diasabra te cu diadomingo mainta 6or. Trinta Polis, incluyendo “Mobiele Eenheid”, e unidad di K-9, Maritiem Politie, RRT y personal di Districto 2, a participa. Un biaha mas Cuerpo Policial a conta cu nan partnernan externo Cuerpo Especial Arubano y D.T.P.
A cuminsa un biaha mas cu un accion di control di vehiculo na e parkeerplaats di “Do It Center” na Noord, unda cu polisnan a controla autonan, chauffeur y pasaheronan for di 7’or pa 9’or y mey di anochi. Aki a detene un persona pa posesion di substancianan prohibi, esta marihuana y cocaina; y a controla un cantidad considerabel di automobilista pa cu posecion di arma di candela. Manera ta custumber a controla tambe e documentonan di e auto y e chauffeur pa incumplimento pa cu e documentonan polis a skirbi algun procesverbaal.
E accionnan a sigui den zona di hotel, unda cu Polis a tene un accion di listramento preventivo cu a inclui un cantidad considerabel di hende. Generalmente comunidad a copera bon cu nan. E zona di hotel tabata druk, pero no tabatin mucho incidente. Considerando e cantidad di actividadnan y e cantidad di hende cu tabata riba pia, Cuerpo Policial ta conclui cu orden y siguridad a keda manteni.
Durante di e anochi, e miembronan di e unidad motoriza a detene 5 chauffeur cu tabata coriendo auto bao di e influencia di alcohol. Nan a haci e test di “supla” y tur a sali na nan desbentaha. Un di e chauffeurnan, un dama, a supla 4 biaha e porcentage di alcohol permiti pa stuur auto.
Cuerpo Policial ta conclui cu en general un fin di siman hopi druk, cu hopi actividad en general, y specificamente hopi evento pa celebracion di Halloween, a bay bastante trankil.