Com cu a drenta e penultimo luna di aña 2016, mesora e eventonan pa fin di aña ta cuminsa tambe y manera ta un tradicion, Alto Comisario di Polis, mr. Adolfi “Dolfi” Richardson ta convoca un permiso general pa presentacion di gruponan di gaita, folklore y Dande dilanti negoshinan riba nos isla. E permiso aki ta vigente cuminsando for di dia 1 di November 2016 te cu dia 31 di December 2016.
Pero, e permiso general aki ta mara na e condicionnan, manera prome cu cualkier grupo por haci uzo di e permiso otorga den e convocacion aki, e persona encarga cu e grupo mester tuma contacto cu e seccion di Planologia y Informacion di Cuerpo Policial durante oranan di oficina, di 7’or di mainta te 3’or di atardi na number di telefon 5852500.
Cuerpo Policial Aruba a pone algun Polis specifico disponibel segun cada districto unda e evento ta tuma luga, manera na Oranjestad ta Bernardo Maduro; pa e districto di Noord y Santa Cruz ta Eddy Maduro y pa e districto di San Nicolaas ta Sheila Merselina. Durante fin di siman e Polisnan aki ta localisabel via Centrale Post di Polis na number di telefon 100. E personanan en cuestion lo controla si e luga, caminda e actuacion lo tuma luga, ta apropia of no.
Ta otorga e permiso general aki bou di condicion cu e ta valido solamente pa e lunanan di November y December 2016. Gruponan di Gaita, Folklore, Aguinaldo y Dande por haci nan presentacion te cu 10’or di anochi. No mag stroba ni trece trafico den peliger bou di ningun circunstancia. No mag laga sushi of cualkier desperdicio atras riba caminda publico despues di e presentacion. No mag toca den vecindario di misa durante sirbishi, hospital, casnan di anciano of otro instituto cu ta duna cuido medico, ni den vecindario di stacionnan di gasolin.
Cuerpo Policial ta subraya cu mester obedece tur ordo di Polis relaciona cu Orden Publico y Polis ta autorisa pa para e evento na momento cu Orden publico ta rekeri esaki of na momento cu constata cu a viola cualkier di e condicionnan aki.