Dialuna merdia, strandpolitie tabata patruyando cu BP4/BP5 den e area di High Rise, caminda cu poco despues di ta nabegando a mira un waverunner blanco bin den nan direccion. E conductor di e waverunner na e momento ey tabata bezig ta lastrando un otro waverunner. Alabes, polis a ripara cu e no tabata haciendo uzo di un safetyvest, cu ta pa su propio siguridad. Den cuadro di esaki e conductor a wordo para, y polis a pidi’e pa mustra un vaarbewijs, cual e no tabata tin. El a laga sa cu e no tin ningun vaarbewijs, ni tampoco ID cun’e. Ora cu polis a puntre unda e ta traha, el a laga sa cu e ta traha na Cesar’s Watersport. El a nenga di bisa polis unda e ta biba. Den cuadro di esaki, e conductor a wordo deteni y hiba na warda di stranpolitie pa identificacion. Eynan e sospechoso a wordo presenta dilanti di fiscal auxiliar. E hoben, kende a bisa cu e yama LJCM, a bisa fiscal auxiliar cu e ta ilegal riba e isla. Na e warda, e hoben tabata tin un rugtas cun’e. Cu su permiso a ristra e rugtas, caminda cu nan a haya un cartera y alabes un gran cantidad di dollar. Den e cartera, e hoben tabata tin un ID Venezolano. Riba dicho ID ta para cu e sospechoso ta naci dia 30 di November 1996 na Venezuela. Fiscal Auxiliar a yama piketofficier y asina pone na altura di un ke otro. Un boet a wordo imponi di e suma di 100 florin, mirando cu e hoben no tabata tin un vaarbewijs. LJMC a paga e boet di biaha cu e dollarnan cu e tabata tin den su poder. Un recibo a wordo duna na dje. Poco despues e sospechoso a wordo pasa pa persona di Warda nos Costa, hunto cu e tas y e resto di placa cash.