LONDON, Inglatera – Polis na London a gara dos hoben cu ta wordo sospecha di a efectua varios atake cu acido den e parti oost di e ciudad. E sospechosonan di 15 y 16 aña tabata spuit acido den cara di nan victimanan.
E incidentenan a tuma luga dentro di 1 ora y mey for di otro den e partinan di Hackney y Stoke Newington. E atacantenan tabata sinta riba un brommer. Segun BBC e hoben sospechosonan a wordo deteni riba sospecho di robo y causa dañonan serio.
E victimanan a wordo hiba hospital. Cerca un di e victimanan, e heridanan segun polis, ta di peliger pa bida of en todo caso basta serio.
Testigonan ocular a bisa tambe cu nan a tende grito riba caya.
London conoce na e momentonan aki un ola di atakenan di acido. Fin di luna pasa, un homber y su sobrina a wordo gespuit cu acido mientras cu nan tabata sinta den auto. BBC a meld cu desde 2010, ya tabata tin 1800 atake. Aña pasa tabata tin 458 victima, contrario di 261 na 2015.
Fuente: www.rtl.nl