TEUGE, Hulanda – Nuebe hende homber, entrenan dos piloto Britanico, a wordo deteni riba sospecho di trafico di persona cu un avioneta for di e airport di Teuge. Te asina leu cu polisnan sa, esaki ta prome biaha cu ta purba contrabandia personanan for di Hulanda.
Polis a haya informacion cu diescuater Albanes, entre cual tres mucha chikito, lo kier a biaha ilegalmente pa Inglatera. E Albanesnan a wordo intercepta na e frontera cu Belgica, diahuebs anochi, na momento cu nan a purba crusa den dos bus. Posiblemente e plan lo tabata pa piki e hendenan na Belgica, prome cu sigui pa Inglatera. Pero esey lo mester sali afo for di e investigacion, segun un vocero policial.
Ademas di e dos pilotonan Britanico, polisnan a detene dos chauffeur Hulandes, y cinco homber Albanes.
Polis a tuma e avioneta, un auto, telefon celular, placa cash y administratie di un compania den beslag. Tur e sospechosonan ta deteni y lo parece dilanti Hues Comisario otro siman.
Fuente: www.anp.nl