Diaranson marduga pa mas of menos 1’or y 15, polis tabata patruyando na pia y a cana bay den Ranchostraat. Yegando na altura di e plenchi cu ta bay for di den Ranchostraat pa Avenida Alo Tromp, a mira un persona desconoci, bisti cu un camisa blanco. Mirando e vecindario y e orario, caminda cu hopi droga ta wordo intercambia y cu algun luna pasa un hende a wordo tira, a dicidi di bay contra dicho homber. Yegando cerca, e homber a cuminsa bay direccion pabao. A base di esaki, a sigui un persecucion na pia. El a core drenta e mesun complex di apartamento, caminda cu un hende a wordo tira.
Polis a mira e homber drenta un espacio. Un otro homber a bin di biaha pago y a bis’e, cu un homber desconoci a drenta su apartamento y cu e ta haya permiso pa drenta paden. Ora cu polis a drenta paden, a scucha un klap duro. Tabata mescos cu e tapa di WC a cera. E momento ey polis a cana bay WC y a mira un hende ta scondi eyden. A acerca e homber y a mira cu ta esun cu mas tempran tabata core. A bise pa hisa su mannan y draainan. El a cumpli cu loke polis a bise. Polis por a sinti den su saconan di carson cu e tabata tin hopi placa los. Un otro agente policial a ristra rond di e homber. Ora cu a habri e tapa di WC, a constata cu e awa tabata blanco manera puiro aden, mientras cu den e tanki di WC por a mira un saco doorzichtig cu contenido tres saco chikito cu marihuana aden y un pida placa di heroina. A base di esaki, e homber, kende a indica cu e yama LGR, a wordo deteni. E sospechoso a wordo ristra y a bin haya hopi biyete di dollar los y monedanan di cinco florin riba dje.
E sospechoso a declara cu e ta un uzado di droga y cu e ta ilegal na Aruba. El a drenta na un manera ilegal via boto. Alabes e no sa ki adres e tin na Aruba. Unicamente cu e sa cu e ta biba cerca di un supermercado.