Strandpolitie a tene patruya riba bicicleta den Hot Zone entre 6’or di atardi y 4’or di mainta. E tabata basta rustig, mientras cu un dia prome tabata dia di Himno y Bandera. Pa loke ta Palm Beach Plaza y Paseo Herencia, a tene patruya na pia y tabata hopi rustig. Pa mas of menos 8’or y mey di anochi, ora cu patruya riba bicicleta na altura di Riu Palace, a mira un hoben color scur. E tabata tin un tshirt preto y un bermuda di varios color, slof na pia y un tas color cora. E tabata canando cerca di Rudy’s Hut. Pa patruya riba bicicleta, e luga ta conoci pa bendemento di droga. E hoben aki tabata actua hopi sospechoso ora cu el a mira patruya riba bicicleta y a purba di cana bay. El a wordo ristra, pero no a haya nada riba dje. Dilanti di e hut tabata tin un katrol cu manera un bar traha di palo. Eyden tabata tin dos saco cu un tipo di puiro blanco. Tabata tin un saco chikito y uno mas grandi cu substancia parecido na cocaina. Mesora esaki a wordo confisca. Alabes e hoben aki a wordo confronta, pero el a nenga di tin algo di haber cun’e. Despues el a wordo bisa pa bay di e luga. Rudy’s Hut y vecindario a wordo ristra, pero no a haya nada mas. A controla na altura di e clubnan nocturno. Gusto y Sandbar tabata druk. South Beach Lounge y 297 tabata basta trankilo. Den cuadro cu orario di ceramento, e luganan a cera na ora. Pa mas of menos 3’or y mey di marduga, via Central a ricibi informacion di un pelea grandi na altura di Sandbar. Patruya riba bicicleta tabata den cercania y a bay controla, pero tur hende a bay caba. Riba e parkinglot di South Beach patruya riba bicicleta a mira hopi hende hunto. A bin saca afo cu e hendenan aki ta studiantenan di Xavier University, kendenan tabata envolvi den e pelea. Fuera di esey no tabata tin nada en particular.