Caracas, VENEZUELA- Funcionarionan di Policia Nacional Bolivariana (PNB) a detene Elvis Flores, camarografo di e medio digital Venezolanos por la información (VPI), den e manifestacion cu tabata desaroya na Caracas.
Durante e transmision en directo por a observa con un funcionario policial a duna ordo pa coy e ekiponan di e medio aki den beslag. “Comandante, aquí está el equipo”. Esaki por a wordo skucha prome cu e señal a corta.
Flores tabata cubriendo e protestanan patras di e efectivonan policial na Plaza Venezuela.
Abogadonan di VPI a bay na sede di Sebin y otro wardanan di polis buscando pa sa di e paradero di e camarografo.
E Sindicato Nacional de Trabajadores de Prensa a informa cu Flores a wordo deteni na El Helicoide, y cu e ta wordo acusa di ta graba den e “zona di siguridad”.
Compañero di Flores, e periodista Andrés Fornerino, a conta cu e ekipo di VPI tabata cubriendo e manifestacionan pero tambe e pikete di efectivonan di siguridad. Nan dos tabata wardando pa cera e transmision y pa nan wordo cambia pa otro ekipo, ora cu anan a separa door di enfrentamentonan entre autoridadnan y e manifestantenan. E momento ey PNB a detene Flores y a kita su ekiponan for di dje.
Den un comunicado, e medio aki ta exigi e liberacion di nan colega di trabao y ta condena e accionnan aki cu ta agredi, no solamente e Libertad di Informacion, Comunicacion y di Prensa, consagra den leynan Venezolano y den convenionna y tratatonan cu e Republica, sino tambe ta agredi e derecho di un trahado Venezolano cu ta traha pa por mantene su famia y pa duna e informacion na un manera oportuno.