Kralendijk Boneiro: Aki ta sigui un comunicado di Polis Boneiro relaciona cu asistencianan di Polis a brinda.
Diferente kiebro den kas i ladronisia di tapa di wil
Riba djaluna 13 di febrüari a drenta keho di kiebro den un kas situá na Kaya Nikiboko Suit. A bai ku entre otro un lèptòp di marka Lenovo, un oloshi di sambuyá di marka Citizen i un oloshi di marka Tag Heuer Monaco. E kiebro a tuma lugá entre 4 or di mardugá I 11 or di mainta. Riba mesun dia tambe a drenta keho di kiebro den un kas situá na Kaya Thomas M. Marchena. Aki a bai ku entre otro un Playstation 5, dos lèptòp di marka Dell, un ‘headphone’ kolo di guera i un kámara kolo pretu ku parse un GoPro. E kiebro a tuma lugá entre djadumingu 12 di febrüari den oranan di anochi i 14 di febrüari den oranan trempan di mainta. Riba djamars 14 di febrüari a drenta keho di ladronisia di kuater tapa di wil for di un outo di marka Toyota, modèl Yaris. E outo tabata stashoná riba un tereno di stashoná outo situá na Kaya Lodewijk Gerharts. E ladronisia a tuma lugá entre 9 or di mainta i 12 or di mèrdia. Riba djárason 15 di febrüari a drenta keho di kiebro den un kas situá na Kaya Chòkwèkè. For aki a bai ku entre un kadena di oro. E kiebro a tuma lugá entre djamars 14 di febrüari pa mas o ménos 12 or di mèrdia i djárason 15 di febrüari pa mas o ménos 12.15 or di mardugá. Ta investigando tur e kasonan aki.
Aksidente riba Kaya Amsterdam
Riba djamars 14 di febrüari, pa mas o ménos 7.30 or di mainta un aksidente a tuma lugá entre un outo i un bròmer. E bròmer tabata kore tras di e outo i no a mira ora ku e outo a wanta brek, ku konsekuensia ku ela bai dal patras di e outo. A transportá e shofùr di e bròmer ku ambulans pa hospital pa tratamentu médiko.