Kralendijk Boneiro: Polisnan na Boneiro tabata basta ocupa cu asistencianan den fin di siman. Den e wikènt di karnaval tras di lomba e paradanan di karnaval a bai sin ningun problema. Si tabatin algu otro kaso ku a tuma lugá.
Riba djabièrnè 24 di febrüari a drenta keho di robo. E víktima tabata kanando bai kas riba Bulevar Gobernador Nicolaas Debrot alrededor di 2.30 or di mardugá na altura di e krusada ku kaya Irena or ku ela keda sorprendí ku un moketa bou di su wowo robes. E sospechoso a bai ku entre otro su pòtmòni i su telefòn selular. E víktima a keda ku un wowo robes hincha i su djente di dilanti na banda robes, kibrá. Den oranan di anochi riba e mesun fecha aki, pa mas o ménos 10.15 or di anochi, un aksidente entre dos outo a tuma lugá riba Kaya Korona. Outo nr.1 tabata biniendo Playa for di direkshon di Rincon i outo nr.2 tabata bayendo den direkshon di Rincon for di Playa. Den e bògt skèrpi den besindario di e misa, outo nr. 1 a bai kore riba e banda robes di kaminda i e outonan a dal frontal den otro. Shofùr di outo 2 su kara tabata tur na sanger i ambulans a transport’é pa hospital pa tratamentu médiko. Shofùr di outo nr.1 tabata bou di influensia fuerte di alkohòl i detené na e sitio mes en konekshon ku korementu bou di influensia ku un aksidente ku herido komo konsekuensia. Riba djasabra 25 di febrüari a drenta keho di kiebro den un kas situá na Kaminda Lagun. A bai ku entre otro un ‘verrekijker’ kolo pretu di marka Olympus, un kámara digital di marka Canon, un kargadó pa kámara digital, un kòmpuiter kolo di plata di marka ‘Apple Macbook pro’ i seis skopèt di aire bieu kolo maron/pretu. E kiebro a tuma lugá entre 11.30 or di mainta i 3.30 or di atardi. Riba djadumingu 26 di febrüari a drenta keho di ladronisia di dos bòter di bebida alkohóliko na un supermerkado situá na Kaya Industria. E sospechoso a hinka dos bòter di wiski den su tas i kana sali for di e supermerkado. Un trahadó a sali su tras i hendenan den besindario a yuda tene e sospechoso. Na dado momentu e sospechoso a logra kore bai pero no a yega leu i polis a detené den besindario mes. Ta trata di un hòmber ku inisial O.H.G. Riba djabièrnè 24 di febrüari tambe a duna keho kaba di ladronisia di bebida alkohóliko dor di e mesun sospechoso. Riba djaluna 27 di febrüari a detené un hòmber di inisialnan J.M.R.T. en konekshon ku destrukshon na un kas i un outo na Kaya Grandi. Riba mesun dia a drenta keho di ladronisia di entre otro un iPhone kolo blanku i oro i sèn kèsh ku tabata den un tas kolo ros ku bèrdè. E tas tabata den un outo na e sitio turístiko Boka Onima ora ku deskonosí(nan) a bai ku esaki riba djadumingu 26 di febrüari. Mas lat a drenta keho di kiebro den kura di un kas situá na Kaya Tintorero. Riba djadumingu 26 di febrüari a bai ku entre otro un mashin di bora i un ‘kangu’ di marka Makita ku tabata pafó riba mesa. E ladronisianan, kiebronan i e robo ta bou di investigashon.