Diadomingo pa mas o menos 3:30 marduga central di Polis ta haya un yamada unda un persona a atraca un homber altura di Setar teleshop na Palm Beach.
Patruya a presenta na e sitio y combersa cu e victima y a indica cu el a caba di labora y bayendo na su auto un auto color shinishi a para banda di dje y dos homber a sali for di e auto. Un di nan tabatin cuchiu den man y e otro e no sa sigur si lo ta un arma di candela.
E hombernan no tabatin cara tapa y nan a pidie pa su pertenencianan y lo ta papia spaño. Despues nan a subi un mitsubishi color shinishi y bandona e sitio. E oficialnan a cuminsa cu un buskeda den e bisindario y altura di Sasakiweg banda di e saliña nan a bin topa cu un di e atracadornan na pia y bay over pa detene di biaha y a keda transporta pa warda di Shaba. Mientras un di e otro sospechoso a core drenta e saliña huy pa e oficialnan.
Rato despues a topa cu e mitsubishi lancer color shinishi cu dos homber aden y tabata cuadra cu e descripcion cu e victima a menciona di e sospechosonan. E polisnan a bay over na detene e sospechosonan y hibanan pa warda pa nan keda interoga y wak si nan tin algo di haber cu e caso. Recherche di atraco team tambe a presenta na warda pa sigui cu e caso aki, y e victima a keda atendi pa personal di slachtofferhulp debi cu e tabata basta spanta di e atraco.